Дубай вакуумды пойыздар жүргізуді жоспарлап отыр
Біріккен Араб Әмірліктері аса қатты жылдамдықпен жүйткитін вакуумды пойыз жүйесін енгізуді қолға алды. Осыған байланысты Дубай қаласында аталмыш көлік пен оның құбыр тәріздес жол үлгісі таныстырылды.Мамандардың айтуынша, вакуумды пойыз болат қабыршақтың ішінде желілік электрқозғалтқыштың көмегімен жүретін болады. Ал құбырда ауа кедергісі болмайтындықтан пойыздың жылдамдығы сағатына 1 мың 200 шақырымға дейін жетеді екен. Егер жоба іске асып жатса, Дубайдан Абу-Дабиге 12 минуттың ішінде жүріп өтуге мүмкіндік туады. Ресми өкілдер ауқымды жобаны жүзеге асыру 3-4 жылдан кейін басталады деп отыр.
Абдель Мосен Ибрагим, БАӘ-нің теміржол және көлік агенттігінің төрағасы:
- Біз жобаны жүзеге асыру үшін америкалық компаниямен келісімге отырдық. Бірақ жүйені ел аумағында енгізу үшін алдымен оның техникалық-экономикалық тұрғыдан тиімділігі зерттелді. Қазір жүйе жан-жақты талданып, әзірленіп жатыр.
