Осыған орай аудандық сот өкілі мен билер кеңесінің мүшесі аграрлы-техникалық колледжде студенттермен кездесу өткізді. Онда «Отбасын сақтау – кәмелетке толмаған баланың құқығын қорғау» тақырыбында дәріс оқылды. Аудандық сотының судьясы Е.Құтыбаев осы мәселе аясында студенттермен ашық әңгіме жүргізді. Отбасын сақтау, балалардың толық отбасында тәрбиелеу, оларға қиын өмірлік жағдайларда тегін құқықтық және психологиялық көмек көрсету, сондай-ақ ажырасуға келген ерлізайыптыларға да психологиялық көмек беру, сотта татуласу орталығына жіберіп, некені бұзбай сақтап қалу керек екенін айтты.

   Екі жақтың бітімгершілікке келуіне медиацияның да көп көмегі бар. Бүгінде билер кеңесінің мүшесі, медиатор Ө.Өміртаев жастарды әдепті де саналы етіп тәрбиелеу үшін ең алдымен ұлттық дәстүрді, әдет-ғұрыпты, ата-бабалардан қалған насихат мұраларын жастардың санасына сіңіре білу басты міндет екенін жеткізді.

   Жиында қатысушыларға «Отбасылық сот» пилоттық жобасы негізінде түсірілген бейнебаян көрсетілді. Студенттер судьяларға өздерін толғандырған сауалдарын қойып, пікірін тыңдады.