Рамазан – мұсылманның мүмкіндік айы

Мұсылман үшін қасиетті саналатын, шуақ шашқан Рамазан айы да келіп жетті. Бұл – сіз бен біз білмейтін сырларға толы ай.

Рамазан – рақым айы. Алла Елшісі: «Кімде-кім рамазан айында шынайы сеніммен, сауабын бір Алладан үміт етіп, ораза ұстаса, бұрын-соңды жасаған күнәлары түгелдей кешіріледі», деген. Қасиетті айдың құрметі үшін бір-бірін кешіріп, мейірімділік жолын ұстанған пенделер сауапқа кенеледі. Өзгеге мейірім көрсеткен адамға Жаратқан оны мейіріміне бөлейді. Кешіргенге – кешірім жасалады.

Қасиетті айда сауап амалды молынан жасап қалыңыз. Себебі дәл осы айда сауаптар еселенеді. Жақсылықтың сыйы – тек қана жақсылық. Аузы берік адам тілін жаман сөзден тежейді. Өйткені ардақты пайғамбарымыз Мұхаммед: «Кім болса да ораза ұстаған күні жаман сөз айтпасын, әрі ешкімге дауыс көтермесін...», деп өсиет еткен. Рамазан айында ораза арқылы төзiмдiлiк, шыдамдылық, сабырлылық, жанашырлық, тақуалық секiлдi iзгi қасиеттердi өн бойымызға жинауға тырысамыз. Сондай-ақ бұл уақыт – қайырымдылық, мейрiмдiлiк, ізгі амалдардың еселене жасалатын уағы. Сол арқылы сауабымыз артып, күнәларымыз кешiрiледі. Оразаның денсаулыққа да берер пайдасы мол.

Рамазан айында тұтқан оразамыз бізді шыдамдылыққа, сабырлыққа тәрбиелейді. Алла тағала баршамыздың ниетімізді қабыл етіп, ораза тұтуымызды, жақсылыққа жолығуымызды нәсіп етсін. Тұтқан оразаларыңыз қабыл болсын.