Бақыт кілті – отбасында

Жақында аудандық аналар кеңесінің ұйымдастыруымен өнегелі отбасылардың жастармен кездесу кеші өтті. Аталған іс-шараға аудандық аналар кеңесінің төрайымы Г.Раева, облыс әкімі аппаратының «Қоғамдық келісім» КММ аудан бойынша сарапшысы А.Нұрмағанбетова, және аудандық ішкі саясат бөлімінің бас маманы Ғ.Нысанбаев қатысты.

Мұнда үлгілі отбасылар туралы бейнебаян көрсетіліп, көпшілік қауым отбасы тақырыбында әңгіме қозғап, ойландырып жүрген тақырыптарды көтеріп, пікір-тілектерін білдірді. Шаңырақ шаттығы мен отбасы берекесінің қуанышы қандай, қиындық неден туындайды деген мәселелер төңірегінде әңгіме өрбіді. Бұл жолғы тақырыптың жөні бөлек. Қаншама отбасы бақытсыздыққа ұшырап, жетім мен жесірдің саны көбейгені әрине, өзекті өртейді. Осы төңіректе мұндай жағдайға жетпеу үшін не қажет, нені ескеру керек деген сұрақтарға толық жауап берілгендей болды. Отбасылық құндылық мәселесі қазір күн тәртібінен түспей тұрған өзекті тақырыпқа айналды. Сондықтан, жастар арасында мұндай түйткілді тақырыптарды көтеріп отырудың маңызы айрықша екені де шындық.

Ұлттық отбасылық құндылықтарымызды насихаттауда өнегелі тәлім-тәрбиесі жастарға үлгі болып келген отбасылар ұйымдастырушылар атынан алғыс хатпен марапатталды.