Жыл басы келеді
Айткүл Үбісұлтанқызы Тұрмағамбет ауылының тумасы. Ол жыр күмбезін қондырған үкілі Сыр елінен шыққан жырау әрі шежіреші Үбісұлтан Аяпұлының ұрпағы. Айткүл – бүгінде орталық ауруханада еңбек етеді. Қолы қалт еткенде қолына қалам алып, өлең жазады. ЖЫЛ БАСЫ КЕЛЕДІ
Жотасы жібіп жыра сай,
Сылаңдап сылқым бұлақтай.
Сырласты бақтар жағалай,
Жүрегім сен де сыр ақтар.
Көтерсе басын раңдар,
Сұраңдар содан көктемді.
Диқандар жазар шығарма,
Дәптер ғып қыр мен бөктерді.
Құмартып шопан жайлауға,
Жусанның исін сағынар.
Бойжеткен сұлу қыздарға,
Сағыныш хаттар ағылар.
Есігін ашып үйімнің,
Гүл болып жайна өлеңім.
Шуағын құйған мейірімді,
Наурызды шексіз сүйемін!
