Сүлейлер өсіп-өнген қарашаңырақ

Бүгін Тұрмағамбет ауылы Қ.Бүрлібаев атындағы ауылдық клуб үйінде Тұрмағамбет ауылының 60 жылдығына және Жиенбай жырау Дүзбенбетұлының 155 жылдығына арналған «Сүлейлер өсіп-өнген қарашаңырақ» атты ғылыми-танымдық конференция өтті.

Конференцияға аудан әкімінің орынбасары Еркебұлан Қайырбекұлы, ақын, еңбек ардагері – Жұмабек Нұрмаханұлы, Қазақ Ұлттық өнер университетінің профессоры, жырау, Қармақшы ауданының «Құрметті азаматы» - Алмасбек Нұрмаханұлы, еңбек ардагері, Қармақшы ауданының «Құрметті азаматы» - НұртілеуСалықов , сондай-ақ осы ауылда туып-өскен қоғам қайраткерлері және ауыл тұрғындары қатысты.

Конференцияда аудан әкімінің орынбасары ЕркебұланМеңлібаев сөз алып 

«Көгіне әні мен дәні қатар өрлеп, еліне құт-береке дарып, қасиетті Сыр ана бойын «Жыр елі» атандырған Сүлейлер туып өскен, бұл күндері экономикасы мен әлеуметтік жағдайы мен мәдениеті қатар дамыған аудандағы іргелі елді мекендердің бірі – Тұрмағамбет ауылының құрылғанына 60 жыл толып отыр.

Сонымен қатар, Ұлы Сүлейлер көшінің көрнекті өкілі - Жиенбай жырау Дүзбенбетұлының туғанына 155 жыл толуы да осы атаулы күнмен тұстас келіп отыр.

Мұхтар Шаханов Москвада орыстың белгілі ақыны Евгений Евтушенкомен бір кездесуінде «Қазақстанның бір ауылынан 100-дің үстінде ақын-жыршыларының шыққанына куә болдым» дегенде ол бұған сенбегендей: «Ол мүмкін емес, бүкіл Балтық жағалауы елдеріндегі ақындар саны 100-ге жетпейді...» деген екен.

Ақын, жыршы-жырауларымен қатар бұл топырақта қан майданда ерліктің үлгісін көрсеткен Кеңес Одағының батырыТәйімбет Көмекбаев, еңбектің көркін қыздырған көптеген әке-аналарымызбен бірге бүгінгі күні ортамызда отырған Батын Ана, Еңбек Ері Сәлима Жұмабекова сынды ел ардақтылары туып-өскен» деп атап айтып өтті.

Сонымен қатар конференция барысында, «Жыр дүлділі–Жиенбай жырау» тақырыбында Жұмабек Аққұлов, «Жыршы-жырауларды Республиканың жоғарғы оқу орындарында кәсіби маман ретінде дайындау мәселесі» төңірегінде Алмасбек Алматов, «Тұрмағамбет ауылы – шайырлар мекені» тақырыбында Зарипа Тасымова баяндама жасады.

Сондай-ақ, Тұрмағамбет ауылының құрылғанына 60 жылдығына орай «Жүз жырауды тербеткен алтын бесік» атты кітаптың тұсауы кесілді.