«Би нұры» фестивалі өтті

Облыстық Қазақстан халқы ассамблеясының ұйымдастыруымен алғашқы рет Достық үйінде «Би нұры» фестивалі өтті. Оған этномәдени бірлестіктердің, орта білім беру ұйымдарының хореграфиялық ұжымдары, қалалық балалар және жасөспірімдер би ансамблдері, жалпы барлығы 16 топ қатысты.Фестивалдің мақсаты жастардың бойындағы шығармашылыққа деген талпынысын арттыру, хореография өнерінің кең ауқымда дамуына атсалысу, өскелең ұрпаққа еліміздің басты байлығы – Қазақстан халқының достық пен бірлігін дәріптеу. Би өнері арқылы этносаралық толеранттылық және қоғамдық келісімнің қазақстандық үлгісін насихаттау болып табылады.

Фестиваль екі кезеңнен тұрады. Халық биі және таңдау бойынша еркін тақырыптағы би қойылымы. Оған 9-13 жас және 14-18 жас аралығындағы балалар қатысты. Қазылар алқасы би ұжымдарын орындаушылық шеберліктері, шығармаларының композициялық құрылымы мен сахналық қимылы, киім үлгісі бойынша бағалады.

Нәтижесінде 9-13 жас аралығындағы балалар арасында бас жүлдені «Балбұлақ» халықтық үлгілі би ансамблі, бірінші орынды «Жасмин» татар этномәдени бірлестігі, №140 орта мектептің «Ай-ару» би тобы және «Керемет» балалар театры жеңіп алды.

Ал, 14-18 жас аралығындағы балалар арасында бас жүлдені Назарбаев Зияткерлік мектеп оқушыларынан құралған «Самға» би тобы, бірінші орынды «Реверанс» жеке би тобы мен Назарбаев Зияткерлік мектебінің «Нұр-би» би тобы қанжығасына байлады. Сонымен бірге, екінші және үшінші орын иегерлері де болды.

Жеңімпаздар диплом, алғыс хат және бағалы сыйлықтармен марапатталды.