Шығармашылық кешін берді
Өткен жұмада аудандық К.Рүстембеков атындағы жыраулар үйінде Алдашбай ахун ауылдық клуб үйі «Ән» үйірмесінің белсенді мүшесі, ерекше жан Қайрат Кәрібозов «Өнеріммен өрге жүзем» атты жеке шығармашылық концертін өткізді.
Өнерпаздың кешін аудан тұрғындары, жерлестері мен өнерсүйер қауым, жастар, ардагерлер қатысып тамашалады.
Концерттің ашылу салтанатында аудандық мәдениет және тілдерді дамыту бөлімінің бас маманы Еркінбек Ерсұлтанов құттықтау сөз сөйлеп, өнер иесіне шығармашылық табыстар тіледі.
Кеш барысында Қайраттың орындауындағы көптеген ән талғамы жоғары көрерменнің көңілінен шығып, олардың қошеметіне бөленді.
Мәдени іс-шараға кеш иесінің өнердегі әріптестері де қолдау білдіріп, әннен шашу шашты. Ауданымыздың жас жыршысы Руслан Өтегенов сахна төрінде төгілтіп жыр жырлады. Іс-шараның қорытындысында концерт қонағы, еңбек ардагері Қуандық Бекбаев өнерпазға батасын беріп, ақ жол тіледі.
– Бұған дейін ауылда өнерімді паш етіп жүрмін. Енді азаматтардың қолдауымен аудан орталығында жеке концертімді өткізіп жатырмын. Барша келген қонақтар мен көрермендеріме алғысымды білдіремін, – дейді ол ризашылығын жеткізіп.
Өз тілшімізден
