Облыс әкімінің өткен жылғы халық алдында есеп беруінде«Қызылорда қаласындағы жылу-электр орталығын жаңғырту бойынша қандай жұмыстар атқарылуда?» деген сауалдар қойылған еді.Осыған орай жыл көлемінде бірқатар іс-шаралар қолға алынды.   Сала мамандарының айтуынша, былтыр ҚР Премьер-министрінің бірінші орынбасары Асқар Мамин және ҚР Энергетика министрі Қанат Бозымбаевтың облысқа жасаған іс-сапары барысында бұл жоба қолдау тапқан.Елбасы тапсырмасына сәйкес Сыр өңірінде қуаттылығы 400-450 МВт құрайтын жаңа электр стансасының құрылысын салу көзделген. Дегенмен, бұл мәселе ірі инвестордың жоқтығына байланысты толық шешімін таба қойған жоқ. Дегенмен, өткен жылдың 15-16 қарашасында өткен «Байқоңыр инвест» халықаралық инвестициялық форумы аясында Қызылорда облысы мен Түркияның «Yildizlar SSS Holding A.S» компаниясы арасында меморандумға қол қойылды. Осыған сәйкес түркиялық компаниямен бірлесіп біздің аймақта қуаттылығы 138 МВт құрайтын газ поршендік электр стансасы құрылысын салу көзделген. Аталған жобаның іске асыру нәтижесінде Сыр өңіріндегі электр энергиясы тапшылығының төмендеуі күтілуде.