ЖЫЛ ОҚИҒАСЫ
Тоғыз жолдың торабында орналасқан қасиетті Қармақшы биыл 90 жылдық мерейтойын тойлады. Көсегесі көгерген қайран ел ат шаптырып, ұлан-асыр той қылды. Отыз күн ойын, қырық күн тойын өткізетін қазақы дәстүрмен алты Алаштың баласының басын қосты. Мерейлі мереке қарсаңында «Туған жерге тағзым» жасап, рухани жаңғырған Қазақияның әр түкпірінен қастерлі топырақтың перзенттері туған елге сәлем берді. Түрлі нысандар бой көтеріп, мерейтойға тарту да жасалды. Аспаны әнмен әуелеп, бимен көмкерілген сүлейлер елінің жеті қазынаның бірі ит жылында жетістік желкенін кергенін көзбен көріп, көңілге түйдік.
Айта кетейік, Алаштың абыройын асқақтатқан жылы Ақмешіт қос ғасырлық тойын өткізсе, еңселі Елорда 20 жылдығын тойлады. Бұл да қос тойы қабат, екі дүниесі абат болған қайсар қазақтың қуанышы.
