Қатарластары арасынан ерекше көзге түсетін жас дарын «Жігітке жеті өнер де аз» деген ұстанымның тұт­қасын ұстап, кетік дүниенің кір­піші боп қалануды мақсат еткен. Үнемі ізденіс үстінде жүретін оның бос уақытын табу қиын. Білім ошағында өткізіліп жатқан қайсыбір тәрбие сағаттары мен шаралардың басы-қасында жүреді.

– Алға қойған мақсатым – ел дамуына өз үлесімді қосу. Ол үшін әрине аянбай еңбектеніп, білімге ден қоюым қажет. Сындарлы сынақ ҰБТ-дан жоғары балл алып, өзім қалаған «Математикалық жә­не ком­пьютерлік модельдеу» маман­ды­ғына грантпен оқуға түсіп, маған сенім артып отырған ата-анам мен ұстаздарымның үмітін ақтағым келеді. Бұған толық мүмкіндігім бар, – деді Мағжан Әбілтайұлы бізбен әңгімесінде.

Сенім – ең үлкен күш. Өз біліміне сеніп, әрдайым биіктерге қанат қаққан жас ұланның бұл ерекшелігіне отбасылық тәрбие де баса маңыз болса керек. Шаңырақта қоғамда белсенді болуды дағдыға айналдырған отбасы аудандық «Толағай» отбасылық сайысына қатысып, ІІ орынды еншілеген. Үздіктердің қатарынан үмітті жас 2017-2018 оқу жылында экономикадан республикалық тур­нирдің облыстық кезеңіне аттанып, ІІІ орынды олжалап қайтты. Ал, 2018-2019 оқу жылында аудандық Үсен Қошалақов атындағы математика пәнінен дәстүрлі пәндік олимпиадада топ жарған ол І орынның биігін бағындырды. Мағжан шыққан шыңдар мұ­нымен шектелмеді. 11-сы­нып оқушы­лары ара­сында ұйым­дастырылған жаратылыс­тану-математика циклі бойынша Прези­денттік Олимпиаданың облыстық ке­­­зеңінде жеңімпаз атанса, қараша ай­ы­нда Теміртау қаласында өткен рес­публикалық Президенттік Олимпиадада ар­найы «Сертификатпен» марапатталды.

Айдарынан жел ескен алтын асықтай ұлдардың қазақтың кө­сегесін көгертіп, шоқтығын биік­тетуге талпынған қанаттары тал­­­­­­­майтыны анық. Мағжан Әбіл­тайұлы да осы қатарда тұр. Өйткені, оның бойына қасиетті Қармақшы топырағының құнары дарыған.