ЦИФРЛАНДЫРУ – МЕДИЦИНАДАҒЫ БАСТЫ ТЕТІК
Біз цифрлы технологияны қолдану арқылы құрылатын жаңа индустрияларды өркендетуге тиіспіз. Бұл – маңызды кешенді міндет. Елде 3D-принтинг, онлайн-сауда, мобильді банкинг, цифрлы қызмет көрсету секілді денсаулық сақтау, білім беру ісінде қолданылатын және басқа да перспективалы салаларды дамыту керек. Бұл индустриялар қазірдің өзінде дамыған елдердің экономикаларының құрылымын өзгертіп, дәстүрлі салаларға жаңа сапа дарытты».
ҚР Президенті Н.Назарбаев.
Жалпы, «Цифрлы Қазақстан» бағдарламасы бізге не береді? Оның елге тиімділігі мен Қазақстан халқына берері қандай? Елімізде ҚР Ақпарат және коммуникациялар министрлігі Елбасы тапсырмасымен «Цифрлы Қазақстан» жобасын жүзеге асыра бастады. Бұл бағытта ауданымызда нендей шаралар атқарылуда?
Мемлекет басшысы өзінің халыққа арнаған Жолдауында цифрлы технология арқылы медициналық көмектің қолжетімділігі мен тиімділігін атап көрсеткен болатын. Осы жұмыстың жемісі болар – бүгінде науқастардың электронды түрде тіркеліп, емделуі бір жүйеге түсуде. Цифрландыру бағдарламасы – тұрғындардың денсаулығын сақтау, аурудың алдын алу, диагностикалық, емдік қызметтерді жан-жақты қамтуы қажет. Айтулы бағдарлама төрт бағыттан тұрады. Атап айтқанда, ауыл-аймақты кең жолақты интернетпен қамтамасыз етіп, еліміздің транзиттік мүмкіндігін арттыру, экономиканың салаларында цифрлы технологияны енгізу, мемлекеттік органдар жұмысының сапасын арттыру, сондай-ақ IT мамандар даярлау. Атап айтар болсақ, аудандық орталық ауруханада «Цифрлы Қазақстан» бағдарламасы оң шешімін табуда.
– Өркениет дамып, заман алға жылжыған сайын біз де қоғам көшіне ілесіп отыруымыз керек. Сол себептен де жұмыс барысында өз қызметкерлерімізбен қоса, жергілікті халықтың сауаттылығын арттыруға да жұмыс істеудеміз. Енді бұған дейінгідей дәрігерге кезекке тұрудың қажеті шамалы. Әрбір адам үйде отырып-ақ ауырған жағдайда қаралатын дәрігер мен жедел жәрдемді шақыртады. Сол арқылы емдік және медициналық қызметті ала алады. Осы орайда, ауданның медицина саласына үстіміздегі жылдың қаңтарынан бастап кешенді медициналық ақпараттық бағдарламасы бойынша «Даму мед» қосымшасы енгізілді. Дәрігерге қаралушылар қолына бұрынғыдай карточкамен келмейді, ЖСН-мен электронды түрде тіркеледі. Электронды тіркелімде жеке тұрғынның денсаулығына байланысты барлық мәліметі тұрады. Ауданда 43 мың халық бар десек, соның бірқатарын электронды-амбулаториялық порталға көшірудеміз, – деді амбулаториялық-емханалық қызметі бар аудандық орталық ауруханасының бас дәрігері Жайлыбай Ақкенжеұлы.
Саламаттылық – кез келген мемлекеттің қолындағы алтын кілт. Медицина майталмандарымен бірге, қарапайым тұрғындардың цифрлық жүйемен жұмыс істей бастағаны бізді де қуантады.
– «Даму мед»-ке жыл басынан бүгінге дейін 20 мен 60 жас аралығындағы 8287 адам тіркелді. Берілген 30 пайыздың 19 пайызын орындадық. «Даму мед»-пен 2500 адам дәрігерге тіркелді. 101 дәрігерге үйден шақырту жасалды. Бір ұтымдысы – лабораторияға да жолдама электронды түрде жолданады. Мұнан дәрігердің белгілеген рецептін көре аламыз. Сондай-ақ тұрғылықты халық жылына бір мәрте тексерілуден өте алады. 36 нысаналы индикатордың 20-сына қол жетіп отыр, – дейді орталық аурухананың бағдарламашысы Мадияр Қыпшақбаев.
Президенттің тапсырмасы медицина саласын оңтайландырумен қатар, халыққа да өте тиімді бағдарлама.
– Үйде отырып, терапевт-дәрігерге тізілдім. Тиімдісі – күні мен сағатын өзің белгілейсің. Шұбатылған кезекке тұрмайсың. ЖСН нөміріңді айтсаң болғаны, – дейді Жосалы кентінің тұрғыны Гүлмира Сағаева.
Негізінен, «Цифрлы Қазақстан» бағдарламасы халыққа қай жағынан да тиімді. Әрі оны тез үйренеді. Жұртшылық электронды қызметті алған сайын оның тиімділігіне көз жеткізуде.
Сәрсенкүл РАЙЫМБАЕВА
