ЖАС ӨНЕРТАПҚЫШТЫҢ ЖЕҢІСІ
Ақтөбе ауылындағы №109 орта мектептің оқушысы Сапар Елжан өз қолымен күн энергиясын пайдалану арқылы жүзетін қайық жасады. Осы жобасы арқылы «Ұлы өнертапқыштыққа алғашқы қадам» сайысының аудандық кезеңінен І орынның биігін бағындырған ол облыстық жарыста ІІ орынды еншіледі.
10-сыныпта оқитын бозбала түрлі жобаларды қолға алуды мақсат еткен. Әсіресе, заманауи технологияларды еркін меңгерген ол елді мекен, ауыл тұрғындарына пайдасы тиетін техникаларды дүниеге әкелгісі келеді. Бала күннен ойға алған мақсаты біртіндеп жүзеге асып келеді. Талантты жанның ұстазы әрі жетекшісі Қ.Мерекова болашақта әлемді аузына қаратқан мықты өнертапқыш болатынына сенімді.– Ол тыным таппайды. Қашан көрсең де бірдеңемен шұғылданып отырады. Сәл түсінбей қалса, неге олай деп одан сайын зерттеп, сол мәселені шешпейінше арқаны кеңге салмайды. Сапар Елжанның бұл қасиеті оны биік шыңға шығарарына сенімім кәміл, – деді жетекшісі.
«ҚТ» ақпарат.
