ӘУЕ ТАСЫМАЛЫ РЕКОРД ОРНАТТЫ

Отырысты ашқан Б.Сағынтаев сырттағы сақылдаған сары аязға ден қоймай кете ал­мады. Темірдің өзін көкаяздандырып, қа­рыған сұрапыл суық Астанадан бастап, бір­неше облыстың мазасын кетіріп тұр. Сон­дықтан Премьер күн тәртібінен тыс осы мәселеге жеке тоқталып, бірқатар нақты тапсырмалар берді. Ол метео­рологтардың мәліметтеріне сүйеніп, мұндай ауа райы тағы бірнеше тәулік сақталатынын ескертті. Қазір еліміз­дің 6 өңірінде ауа температурасы 30-40 градусқа дейін төмендеді. Таяу уақыт­та осындай қара суық оңтүстік­тегі төрт өңірді басады деп күтілуде. Осы­ған байланысты Бақытжан Сағынтаев әкімдіктерге жылу желілерінде, әсіресе, шағын қалалардағы шағын қазандық­тарда температуралық кестені сақтау бойынша қосымша шаралар қабыл­дауды тапсырды.

– Әлеуметтік нысандарға – ауруха­наларға, мектептерге және балабақ­шаларға ерекше көңіл бөлу керек. Оқу орындарында сабақтың болмайтыны туралы хабар халыққа барлық қолже­тімді тәсілдермен уақытылы жеткі­зілуге тиіс, – деді ол.

Премьер халық сағаттап автобус күтіп қалмауы үшін қоғамдық көлік дәл кесте бойынша жұмыс істеуі ке­ректігін нықтады. Барлық әкім­діктер өз қызметкерлерінің кезек­­шілік кестесін әзірлеуге тиіс. «112» бі­рыңғай кезек­шілік диспетчерлік қызметінің желісі өскен жүктемені ескере отырып, үздіксіз жұмыс істеуі қажет.

Ішкі істер министрлігіне автожол­дарда пәрменді бақылауды қамта­масыз ету тапсырылды. Қажет болған жағ­дайда көліктің барлық түрлерінің елдімекендерден шығуын шектеу бойынша уақытылы шешім қабылдау және белсенді түсіндіру жұмыстарын жүргізу керек. Ведомство әкімдік­термен бірге, жүргізушілер мен жолаушыларға жылжымалы жылыну бекеттерін, ыстық тамақтануды ұйымдастыруға міндеттелді. Сондай-ақ апаттан құтқару бригадаларының кезек­шілігін, жедел және медици­налық қызмет­терді сүйемелдеуді қамтамасыз ету керек.

– Осы ең суық кезеңді барлық қызметтер нақты әрі үйлесімді түрде өткеруге тиіс. Мемлекеттік органдар мен ұйым­дардың, жеке компа­ния­лардың бас­шыларына жеке қайыры­ламын: қызметкерлеріңізді жұмыс орында­рында кешке дейін ұстама­ңыздар! Мүм­кін­дігінше орталық­тан­дырылған түрде қызметкерлеріңізді жет­кізіп салуды ұйым­дастырған жөн, – деп жүктеді Үкімет басшысы. Ай­тылған мәселелерді ерекше бақылауда ұстау бірінші вице-премьер Асқар Маминнің өзіне тапсырылды.

Үкімет отырысында Инвестиция­лар және даму министрі Ж.Қасымбек «Нұрлы жер» бағдарламасы аясында тұрғын үйді пай­далануға беру бо­йынша әкімдіктер рейтингін жа­рия­лады. Негізі, 2017 жылдың қоры­тын­дысында баспана құрылы­сына барлық көзден 979,8 млрд теңге инвести­ция салын­ды, бұл алдыңғы жылғыдан 18%-ға жоғары. Жеке инвестиция­лардың үлесі 825,8 млрд теңгені неме­се жалпы көлемнің 84,3%-ын, ал мем­ле­кеттік инвести­циялар үлесі – 154 млрд теңгені немесе 15,7%-ын құрады.

«Былтыр 11,2 млн шаршы метр тұрғын үй пайдалануға берілді, бұл 2016 жылғыдан 6,2 пайызға жоғары. «Нұрлы жердің» жылдық жоспары 111%-ға орындалды. Жалпы, 100,8 мың тұрғын үй салынды, оның ішінде 75,8 мың үй немесе жалпы көлемнің 75% жеке сектор есебінен, 25 мың пәтер мемлекеттік ин­вес­тициялар есе­бі­нен тұрғызылды» деді Ж.Қа­сымбек.

Ол тұрғын үйді пайдалануға беру бо­йынша Астана қаласы (2,4 млн шаршы метр) және Алматы қаласы (1,9 млн), сондай-ақ Маңғыстау (833 мың) және Ақтөбе (792,3 мың) облыс­тары көшбасшы атанғанын жеткізді. Соны­мен бірге, Батыс Қазақстан (42,4%), Оңтүстік Қазақстан (36,2%), Қоста­най (35,9%) және Павлодар (31,2%) облыс­тарында тұрғын үй құрылысы көлемінің айтарлықтай өсім қарқыны байқалады. Өңірлерге баспана құрылысына қажетті инфрақұрылымды жүргізу үшін 77,3 млрд теңге бөлінген, оның 99,5%-ы немесе 76,9 млрд теңгесі игерілді.

Мәселені талқылау барысында бірінші вице-премьер А.Мамин, «Бәй­терек» хол­дингінің төрағасы А.Әріп­ханов, Қарағанды облысының әкімі Е.Қошанов, Ақмола об­лысының әкімі М.Мырзалин, Атырау об­лысы­ның әкімі Н.Ноғаев, Маңғыстау облы­сының әкімі Е.Тоғжанов, БҚО әкімі А.Көл­­гінов, ОҚО әкімі Ж.Түй­ме­баев сөз сөйледі.

Мәселені талқылауды қорытқан Үкімет жетекшісі жеткенге тоқмейіл­сімей, бұдан әрі тұрғын үймен қамта­масыз етудің жыл сайын­ғы өсімін 10% деңгейде ұстап тұруды жүктеді.

– «Нұрлы жер» бағдарламасын іске асы­ру­дың алғашқы жылы жақсы нәтиже көрсетіп отыр. Ел тарихында алғаш рет 11 млн шаршы метрден астам баспана пайдалануға берілді. Оған Мемлекет басшысы бастамашы болған жаңа мемлекеттік бағдар­лама­ның арқасында қол жеткізілді. Мұн­дай көрсеткіштер Қазақстан Тәуелсіз­дігінің 26 жылында болма­ған, – деді Бақытжан Сағынтаев.

Ол статистиканы және қабылдау-тапсыру актілерін уақытылы тапсыр­мауға және бас­қаларға қатысты проб­лемалар халыққа түсі­ніксіз себептер болып табылатынын, өйткені бұл тікелей мемлекеттік органдардың құзырет­тіліктеріне жататынын баса назар аудартты.

«Биыл жұмыс барысында мұндай олқы­лықтарға жол бермейміз деген сенім­демін. Оның үстіне биылғы Жол­дауда Елбасы 2030 жылға қарай баспана көлемін әр адамға шаққанда 30 шаршы метрге дейін жеткізуді мін­деттеді, ал бұл жыл сайын 10%-ға өсіріп отыруды талап етеді» деді

Б.Сағынтаев. Ендеше, 2018 жылы «Нұрлы жер» бағдарла­масы көрсет­кіш­тері былтырғы көлемдерден бір миллион шаршы метрге асып түсуге тиісті.

Үкімет жиынында Инвестициялар және даму министрі Жеңіс Қасымбек Қазақстанда ұшақтар мен тікұшақ­тардың ұшу қауіпсіздігін қадағалайтын жаңа ұлттық компания құрылатынын хабарлады.

– Бірлескен жұмыстар негізінде біз «британдық модельді» енгізудің тәсіл­деме­ле­рін жасадық. Ол ұшу қауіп­сіздігі сала­сындағы бақылау-қадағалау функ­цияла­рын – азаматтық авиация сала­сын қадағалай­тын және бақылай­тын ұлттық компания түрін­дегі жаңа құрылымға тапсыру бойын­ша қол­даныстағы заңнамаға өзге­рістер енгізуді қарастырады. Ұлттық компа­ния министрлік алдында есепті болады. Инспектор ретінде жұмыс істейтін кейбір қызметкерлер ұлттық компа­нияға ауысады, – деді Жеңіс Қасымбек.

Министрлік тек осы саладағы мемле­кеттік саясатты қалыптастыру мен халық­аралық қатынас мәселе­леріне ғана жауап береді. Кейін жур­налистерге арналған бас­пасөз мәслихатында министр Азаматтық авиация комитеті штатының көбі – үштен екісі жаңа ұлттық компанияға кететінін айтты. Ол кеткен қызмет­керлердің жалақысы да жоғарырақ болатын көрінеді.

«Біз ұшақтардың да, ұшқыш­тардың да сапасын лайықты тексере алмаймыз. Себебі, комитетке тиісті мамандарды шақыруға шама­мыз жоқ: ол мамандар жеке компания­ларда біз ұсына алатын­нан 4-5 есе көп жала­қы алады. Демек, оларды осы жұмысқа тарту үшін біз тиісті жағдай жасауға тиіспіз. Бұған тек ұлттық компания немесе АҚ форма­сында ғана қол жеткізе аламыз. Бұл үшін мемле­кеттік функциялардың бір бөлігін компания деңгейіне беру талап етіледі. Өйткені барлық халықаралық талаптарға жауап беретін мамандарды тарту туралы сөз болып отыр. Әйтпесе, комитетте қабылданған жалақы­ларға бұл мамандарды сапалы тартуды қамта­масыз ете алмаймыз» деп түйді ми­нистр.

Айтқандай, 2017 жылы отандық әуе компаниялары жолаушылар тасымалы жөнінен рекорд орнатыпты: жолау­шылар ағынының өсімі 23%-ды құрады. Бұл – соңғы 25 жылдағы ең үлкен көрсеткіш. Мұндай жетістікке жетуге EXPO – 2017 көрмесінің сәтті өтуі ықпал еткен екен. Транзиттік жо­лау­шылар тасқыны 30%-ға, жүк тасы­малы 24%-ға артқан. Жалпы алғанда, 2017 жылы Қазақстан әуежайлары 14,2 млн жолаушыға қызмет көрсетті.