АҚЫН МҰРАСЫ ЖАҢҒЫРДЫ
Шәмшат Төлепова атындағы мәдениет үйінде аудандық жастар ресурстық орталығы мен «Сана» зияткерлік жастар» қоғамдық қоры және аудандық мәдениет үйінің бірлесе ұйымдастыруымен Қармақшы ауданының құрылғанына және ақын, ұстаз, Мұқамбетқали Шыңғысовтың туғанына 90 жыл толуына байланысты «Өмірде өшпес із қалдырған – Қали ақын» атты мектеп оқушылары арасында мәнерлеп оқудан аудандық байқау өтті.
Ақын Мұқамбетқали Шыңғысовтың өнегелі өмір жолы мен шығармашылығын насихаттау, ақынның өскелең ұрпақты адамгершілікке, отансүйгіштікке және қағытпа қалжың, астарлы әзіл арқылы тәрбиелеудегі азаматтық болмысын үлгі тұтып, адами қасиеттерді жастарға ұғындыру, сондай-ақ жастардың сахнада орындаушылық шеберлігін шыңдау мақсатында өткен байқауға 16 жас талапкер қатысып, ақын шығармаларын мәнерлеп оқу бойынша өзара сайысқа түсті.Тағылымы мол, тәрбиелік мәні зор әдеби шара соңында әділқазылар алқасының мүшелері аудандық жастар ресурстық орталығының директоры Әділ Ыбрахым мен Қызылорда облыстық жастар ресурстық орталығының жұмыспен қамту бөлімінің басшысы Жасұлан Тасабаев байқауға қатысушыларға сәттілік тіледі. Сонымен бірге, байқау қорытындысымен жеңімпаз атанған Төретам кентіндегі №85 орта мектептің оқушысы Әсел Сабырбаева мен ІІ және ІІІ орын иегерлері төретамдық Рахат Төрежан және №26 орта мектептің оқушысы Сүйеніш Бекмырзақызын арнайы дипломдармен марапаттап, сый-құрмет көрсетті.Н.ӘБІЛАХАТҰЛЫ,
«Қармақшы таңы».
