БАҚЫЛАУ ТОБЫ РЕЙДКЕ ШЫҚТЫ
Жақында «Нұр Отан» партиясы аудандық филиалы жанынан құрылған сыбайлас жемқорлыққа қарсы күрес партиялық бақылау және аудандық сыбайлас жемқорлыққа қарсы күрестің арнайы мониторингтік топтарының бірлесе ұйымдастыруымен Жосалы кентіндегі әлеуметтік нысандар мен көшелерге жүргізіліп жатқан жөндеу жұмыстарын бақылау мақсатында рейд жүргізілді.
Құрамында «Нұр Отан» партиясы аудандық филиалы төрағасының бірінші орынбасары, аудандық мәслихат депутаты Дастан Буханов, аудандық сыбайлас жемқорлыққа қарсы күрестің арнайы мониторингтік топ басшысы, Халықаралық «Қазақ тілі» қоғамы аудандық филиалының төрағасы Әбдірахман Құлдүйсенов, мүшелері аудандық мәслихат депутаты Гүлжауһар Раева, аудандық «Қармақшы таңы» газеті бас редакторының орынбасары Нұрбай Жанәділов және Жосалы кенті әкімдігі мен құрылыс, қала құрылысы және сәулет, сонымен бірге тұрғын үй коммуналдық шаруашылық, жолаушылар көлігі және автомобиль жолдары бөлімі қызметкерлері өткен жылы ел игілігіне пайдалануға берілген «Айгөлек» балабақшасында болып, Сырдария өзені суының көтерілу салдарынан балабақша ішіндегі қабырғаларының сөгілуіне байланысты жөндеу жұмысын жүргізіп жатқан «Ақмешіт-Мелиоратор» құрылыс мекемесінің атқарып жатқан жұмыстарымен танысты. Мекеме өкілі Қазбек Асылбековтың балабақша бойынша жөндеу жұмысының барысы жайлы хабарламасына назар қойып, атқарылған жұмыстарды пысықтады.
Сонымен қатар, рейд барысында топ мүшелері кент орталығында Аманкелді, Сүлейменов, Абай және басқа да көшелерге «Госзакуп S» мекемесі жұмысшыларының күшімен жүргізіліп жатқан ағымдағы жөндеу жұмыстарымен танысты.
Н.ӘБІЛАХАТҰЛЫ,
«Қармақшы таңы».
