БІЛІМ МЕН ҒЫЛЫМ – ЕЛ ДАМУЫНЫҢ СТРАТЕГИЯЛЫҚ БАҒЫТЫ
Білім мен ғылым – мемлекеттің интеллектуалдық әлеуетін айқындайтын, қоғамның өркендеуіне негіз болатын маңызды құндылықтар. Қай елдің де болашағы білімді ұрпақ тәрбиелеп, ғылымның дамуына жағдай жасауымен тығыз байланысты.
Мемлекет басшысы Қасым-Жомарт Тоқаев Қазақстан халқына Жолдауларында білім беру сапасын арттыру, ғылымды дамыту, адами капиталды нығайту және жаңа технологияларды игеру мәселелеріне басымдық беріп келеді. Бұл міндеттер еліміздің бәсекеге қабілеттілігін арттырып, әлемдік өркениет кеңістігіндегі орнын нығайтуға бағытталған.
Қазіргі таңда жоғары білім беру жүйесінің алдында үлкен жауапкершілік тұр. Университеттер тек білім беретін мекеме ғана емес, ғылыми жаңалықтардың, инновациялық идеялардың және қоғамдық дамудың қозғаушы орталығы болуы тиіс. Осы орайда оқытушы-профессорлар құрамының кәсіби әлеуетін арттыру, жас ғалымдарды қолдау, ғылыми зерттеулердің нәтижелерін өндіріске енгізу маңызды.
Қорқыт Ата атындағы Қызылорда университеті де білім мен ғылымды дамыту бағытында жүйелі жұмыстар жүргізіп келеді. Университеттің басты мақсаты – бәсекеге қабілетті мамандар даярлау, ғылыми ізденістерді қолдау және өңірдің әлеуметтік-экономикалық дамуына үлес қосу.
Менің пайымдауымша, білім мен ғылымға жасалған инвестиция – елдің ертеңіне жасалған инвестиция. Сондықтан бұл салаға қолдау көрсету тек бүгінгі күннің міндеті емес, келер ұрпақ алдындағы жауапкершілігіміз.














