Ауыл спорты – ұлттық құндылықтың бір бөлігі

Ауыл спорты – халқымыздың тұрмыс-тіршілігімен біте қайнасқан ұлттық мәдениетіміздің маңызды бөлігі. Ауыл жастары үшін спорт – денсаулықты нығайтумен қатар, ұйымшылдыққа, төзімділікке, шапшаңдыққа және намысқа тәрбиелейтін үлкен мектеп.

Қармақшы ауданында да ауыл жастары арасында спортты дамытуға ерекше көңіл бөлініп келеді. Футбол, волейбол, қазақ күресі, қол күресі, асық ату, бес асық сияқты спорт түрлерінен түрлі жарыстар ұйымдастырылып, жастардың белсенділігі артып келеді.

Дегенмен бұрын ауыл арасында кең тараған, бірақ бүгінде сирек кездесетін ұлттық спорт түрлерін де қайта жаңғырту қажет.

Жамбы ату – қазақтың ежелгі мергендік өнері. Ат үстінде шауып келе жатып нысанаға дәл тигізу спортшыдан мергендікпен қатар, ептілік пен атқа мығым отыруды талап етеді. Бұл ойын жас ұрпақтың батылдығы мен шапшаңдығын дамытуға ықпал етеді.

Теңге ілу – ат үстінде ойналатын ұлттық ойындардың бірі. Шабандоз шауып келе жатып, жердегі теңгені немесе арнайы белгіленген затты аттан түспей іліп алуы керек. Бұл ойын атқа міну шеберлігін, тепе-теңдікті және жылдамдықты қажет етеді.

Бүгінде мұндай ұлттық ойындарды ауылдық жерлерде қайта жандандырып, жастар арасында жарыстар ұйымдастырудың маңызы зор. Себебі ұлттық спорт – халқымыздың тарихы мен дәстүрін дәріптейтін рухани мұра.