АТА ЗАҢДЫ АРДАҚТАҒАН МЕРЕКЕЛІК КОНЦЕРТ
Бүгін ауданымыздың орталық алаңында Қазақстан Республикасының Конституциясы күніне орай салтанатты гала-концерт өтті. Еліміздің құқықтық негізін қалаған Ата Заңымыздың 30 жылдығына арналған бұл мәдени шара – ел бірлігі мен тәуелсіздігін ұлықтаған, рухани-мәдени құндылықтарды дәріптеген тағылымды кеш болды.
Гала-концерттің шымылдығы аудан өнерпаздарының орындауындағы патриоттық бағыттағы ән-күй және музыкалық қойылымдармен ашылды.
Мерекелік кештің көркін еліміздің танымал эстрада жұлдыздары — Дана Кентай мен Alhamның арнайы қатысуымен өткен концерттік бағдарлама аша түсті. Сахна төрінде шырқалған әсем әндер мен әсерлі орындаулар көрерменге көтеріңкі көңіл күй сыйлап, көпшілікке ерекше әсерге бөледі.
Аудан тұрғындары мен қонақтары үшін ұйымдастырылған бұл кеш – ел Конституциясына деген құрметтің, қоғамдық татулықтың жарқын көрінісі.
Конституция күніне арналған шаралар легі алдағы күндері де жалғасын таппақ.
