ҚАРМАҚШЫ БІЛІМ САЛАСЫНДАҒЫ ҮЗДІК ЖЕТІСТІКТЕРІМЕН ЕРЕКШЕЛЕНУДЕ
Қармақшы ауданында білім беру саласы бойынша толағай табыстарға қол жеткізілуде. Бұл туралы Қызылорда облысының Өңірлік коммуникациялар қызметінде аудан әкімі Жандос Еркінбек мәлім етті.
– Білім – ел болашағының негізі. Ауданда бұл бағыттағы жұмыстар жүйелі түрде жүргізіліп, сапалы нәтижелерге қол жеткізіліп келеді, – деді аудан басшысы.
2024–2025 оқу жылында ауданда 14 928 оқушы білім алуда. Биылғы мектеп бітіруші 766 түлектің 694-і, яғни 90,6%-ы Ұлттық бірыңғай тестілеуге қатысты. Оның ішінде 54 түлек – «Алтын белгі», 48-і – «Үздік аттестат» иегері атанды. 147 оқушы 100 және одан жоғары балл жинады.
Соның нәтижесінде Қармақшы ауданы облыс бойынша үздік аудандар қатарына енді. Ал екі оқушы облыс бойынша ең жоғары – 138 балл жинап, ауданның білім саласындағы жетістігін айқын көрсетті.
Сондай-ақ, биыл ерекше білім беруді қажет ететін балаларды дамыту және оңалту мақсатында аудандық бюджет есебінен 25 млн теңгеге ғимарат сатып алынып, Қармақшы ауданының психологиялық-педагогикалық түзету кабинеті коммуналдық мекемесіне табысталды.
