14 маусымда найзағай, шаңды дауыл және аптап ыстық күтіледі – синоптиктер ескерту жасады
14 маусым күні Қазақстан аумағының басым бөлігінде құбылмалы ауа райы сақталады. Атмосфералық фронттардың әсерінен кей жерлерде жаңбыр жауып, найзағай ойнайды, бұршақ жаууы мүмкін. Тек еліміздің солтүстігі мен оңтүстігінде жауын-шашынсыз ауа райы күтіледі, деп хабарлайды Anyqtime.kz.
Қазгидрометтің мәліметінше, республиканың бірқатар өңірлерінде жел күшейіп, шаңды дауыл тұрады. Атап айтқанда:
Жамбыл облысында найзағай, дауыл, бұршақ күтіледі. Жел 23-28 м/с-қа дейін күшеюі мүмкін.
Түркістан облысында таулы аймақтарда найзағай, жел және шаңды дауыл болады (17-25 м/с дейін).
Қызылорда облысында күндіз желдің екпіні 23 м/с-қа жетіп, шаңды дауыл көтеріледі.
Маңғыстау мен Батыс Қазақстан облыстарында найзағай, бұршақ және 15-20 м/с жылдамдықпен жел тұрады.
Атырау, Қарағанды, Шығыс Қазақстан облыстарында найзағай күтіліп, күндіз жел күшейеді.
Ақтөбе облысында түнде найзағай жарқылдап, 20 м/с екпінде жел соғуы ықтимал.
Алматы, Қостанай, Павлодар облыстарының кей бөліктерінде күндіз жел 15-20 м/с дейін күшейеді.
Ақмола облысында найзағай болжанса, Солтүстік Қазақстанда түнде және таңертең тұман түседі.
Сондай-ақ, синоптиктердің болжамынша, Атырау облысының кей жерлерінде және Қостанай облысының оңтүстігінде қатты ыстық күтіледі.
Өрт қаупі де сейілер емес:
Қызылорда, Түркістан, Жамбыл, Ақтөбе, Павлодар облыстарының басым бөлігінде, сондай-ақ Алматы, Қарағанды, Қостанай, Ақмола, Батыс және Шығыс Қазақстан облыстарының кей аудандарында өте жоғары өрт қаупі сақталады.
