Кәсіпкер тек қолма-қол ақшамен төлем жасауды талап еткен жағдайда не істеу керек: Мамандар жауап берді

Маңғыстау облыстық мемлекеттік кірістер департаменті кәсіпкерлердің тауар немесе көрсетілген қызмет үшін тек қолма-қол ақшамен төлем жасауды талап ету жағдайлары жиілеп кеткенін мәлімдеді. Бұл туралы Stan.kz ақпарат агенттігі хабарлайды.

Мемлекеттік кірістер департаментінің мәліметінше, қолма-қол ақшасыз төлемдерді қабылдаудан бас тарту заңсыз. Департамент еліміздің "Төлемдер және төлем жүйелері туралы" заңында бірнеше төлем тәсілі көрсетілген: 

- банк картасы арқылы; 

- QR-код арқылы;

- қолма-қол ақша арқылы.

"Кәсіпкерлерге банк карталары арқылы жасалатын төлемдерді қабылдаудан бас тартқаны үшін әкімшілік жауапкершілік қарастырылған: бірінші рет – ескерту, қайталанған заң бұзушылық жағдайында – 40 АЕК мөлшерінде айыппұл (157 280 теңге)”, – делінген хабарламада. 

Сонымен қатар қолма-қол ақшасыз төлемдерді қабылдаудан бас тарту фактілері туралы азаматтар мемлекеттік кірістер органдарына арыздана алады.