БҮЛДІРШІНДЕРДІҢ ТАМАША ТАРТУЫ
Наурыз айы мерекеге толы кезең. Көктемнің бұл алғашқы айы Алғыс айту күнімен басталса, әрі қарай Аналар мерекесі, одан кейін Ұлыстың Ұлы күні әз Наурызға жалғасты. Бұл уақыттағы мерекелер жанға жылу сыйлап, табиғат Ананы нұрландырғаны сөзсіз.
Жақында аудандағы Т.Көмекбаев атындағы No250 мектеп-лицейінде мерекеге орай іс-шара ұйымдастырылды. Онда мектепке даярлық топтың бүлдіршіндері «Адамзаттың асылы – Ана» деп жүректегі тартуын өнермен паш етті. Ұлдар ұстазымен ән айтса, қыз балалар қылықты би билеп, көрерменнің ыстық ықыласына бөленді. Аналардың құрметіне өлең жолдарын да арнап көңілдерін бір серпілтті.
Іс-шара соңында аудандық Аналар кеңесінің төрайымы Гүлжауһар Раева бүлдіршіндердің өнеріне ризашылығын білдіріп, Алғыс хат табыстады.
Ерсін СӘДУҰЛЫ
