ҚҰРМЕТ ТӨРІНДЕ- НӘЗІК ЖАНДАР
Аудандық мәдениет үйінде 8 наурыз – Халықаралық әйелдер күніне арналған «Әйелмен әлем әдемі» атты салтанатты іс-шара өтті. Көктемнің шуақты мерекесіне орай ұйымдастырылған кешке аудан әкімі Жандос Еркінбек қатысып, ардақты аналар мен нәзік жандыларды құттықтады.
Мерекелік кеш «Сіздер үшін махаббатпен!» атты әсерлі прологпен басталды. Сахна төрінен жылы лебізін білдірген аудан әкімі қоғамның әр саласында табысты еңбек етіп жүрген қыз-келіншектердің ерен еңбегін атап өтіп, бірқатар нәзік жандыларға алғыс хаттар мен естелік сыйлықтар табыстады.
Шара одан әрі аудан өнерпаздарының концерттік бағдарламасымен жалғасты. Әсем ән мен көркем биден шашу шашылып, кештің көркін қыздырды. Мерекелік көңіл-күйге бөленген қонақтар ұйымдастырушыларға алғыстарын білдіріп, көтеріңкі көңіл күймен тарқасты.
