АҚЫНҒА ҚҰРМЕТ
Аудан әкімі Жандос Еркінбек Қармақшы ауданының Құрметті азаматы, ақын әрі жазушы Алтай Үсенұлын қабылдап, 70 жылдық мерейтойымен құттықтады.
Аудан басшысы мерейтой иесінің бұқаралық ақпарат құралдары саласындағы елеулі еңбегі мен шығармашылық жетістіктерін ерекше атап өтті. Алтай Үсенұлы ұзақ жылдар бойы аудандық «Қармақшы таңы» газетінде абыройлы қызмет атқарып, ширек ғасырдан астам уақыт басшылық еткен. Оның жетекшілігімен талай жас журналистер тәжірибе жинақтап, медиа саласында танымал тұлғаларға айналды.
Сондай-ақ аудан басшысы талантты қаламгердің рухани байлығы мен шығармашылық қарымының ел құрметіне бөленіп, одан әрі де кемелдене беретініне сенім білдіріп, оған зор денсаулық, ұзақ ғұмыр, отбасы амандығы мен шығармашылық табыстар тілеп, аудан халқы мен әріптестері атынан ризашылық білдіріліп, қазақы дәстүрге сай иығына шапан жауып, құрмет көрсетті.
Одан кейін, «Сырмедиа» ЖШС бас директоры Марат Аралбаев, аудандық ардагерлер кеңесінің төрағасы Асқар Мереков, білім саласының ардагері Дастан Нәзікбаевтар сөз сөйлеп, мерейлі мерейтойымен құттықтады. Сондай-ақ, Қызылорда облысының Құрметті ардагері төсбелгісі табысталды.
