Колледж командасы үздіктер қатарында
Биыл Байқоңыр қаласындағы іргелі және жалғыз жоғары оқу орны «Восход» МАИ филиалының құрылғанына 60 жыл толып отыр. Бұл оқу орнынан сан мыңдаған маман түлеп ұшты. Институт түлектері алған білімдері мен дағдыларын ғарыш айлағында ғана емес, Ресей мен Қазақстанның, сондайақ әлемнің басқа елдеріндегі ірі кәсіпорындарда қолдануда.
Жақында Байқоңыр қаласында «Восход» МАИ филиалының 60 жылдығына орай волейбол мен баскетболдан кәсіптік білім беру мекемелерінің студенттері арасында жарыс өткізілді. Осы жарысқа С.Жиенқұлов атындағы Байқоңыр жоғары колледж командасы қатысып, волейболдан жүлделі І орынды, ал баскетболдан ІІІ орынды иеленді. Сондай-ақ ТЭ-124 оқу тобының студенті Азамат Өтепбергенов «Үздік жалғаушы», ТС-124 оқу тобының студенті Нұрсұлтан Қанатшаев «Үздік қорғаушы» номинациясымен марапатталды. Бұл колледждің қанжығасы халықаралық деңгейдегі тағы бір кубокпен толықты деген сөз. Осы жарысқа студенттерді дайындап, жаттықтырып, жетекшілік еткен колледждің денешынықтыру пәнінің оқытушылары Ғабит Қалыбаев пен Жазылбек Садуов сынды ұстаздарымыздың еңбегі зор.
Жасұлан КӨБЕКОВ,
Академик С.Жиенқұлов атындағы
Байқоңыр жоғары колледжінің арнайы пән оқытушысы
