КІТАПХАНАШЫЛАР ҚҰРМЕТ ТӨРІНДЕ
Қызылорда қаласында Кітапханашылар күніне орай Ә.Тәжібаев атындағы әмбебап ғылыми кітапханасында «Кітап және қаламгер» атты республикалық семинар болып өтті. Онда ҚР Ұлттық академиялық кітапханасының мамандары арнайы келіп, облыс кітапханашылары үшін шеберлік сабағын өткізді.
Іс-шарада кітапхана саласының өркендеуіне өз үлестерін қосып жүрген аудан кітапханашылары марапат төрінен көрінді. Қазақстандық кітапханалық одақтың «Қазақстанның құрметті кітапханашысы» төсбелгісімен Ақтөбе ауылының кітапханашысы Мархабат Шынарбаева мадақталса, «Кітапхана ісінің ардагері» төсбелгісін Қармақшы ауылының кітапханашысы Бадырақ Гүлнар тағынды. Ал облыстық кітапхана басшысының Алғыс хатымен ІІІ Интернационал ауылының кітапханашысы Рима Тұрманова мен аудандық кітапхананың кітапханашысы Марияш Қарамановалар марапат төрінен көрінді.
Семинар барысында облыс кітапханашыларының қатысуымен «Өрелінің өрісі кең» атты интеллектуалды ойын өткізілді. Ойынға 7 аудан, қала және Ә.Тәжібаев атындағы облыстық әмбебап ғылыми кітапханасынан 7 адамнан құралған 9 команда қатысты. Кітап, кітапханалар тарихы, шығармалар желісі және түрлі салалар бойынша логикалық сұрақ қойылды. Ойын қызықты және тартысты өтті. Әділқазылар шешімімен ІІ орынды ауданның кітапхана мамандарынан құрылған «Қорқыт елі» командасы иеленді. Білім мен білік сынға түскен сайыста жеңіс төрінен көрінген кітапханашыларға шығармашылық табыс тілейміз.
«ҚТ» ақпарат
