Кітапханашылар бақ сынасты

qarmaqshy-tany.kz Аудандық кітапхананың ұйымдастыруымен Ақжар ауылында «Ауылдық кітапхана. Жаңа кезең – жаңа жұмыс түрлері» атты кітапханашылардың кезекті зерделі кеңесі өтті. Басты мақсат – Ақжар ауылдық кітапханасының жұмысымен танысу, кітапханашылар бір-бірімен тәжірибе алмасу.

Жиын «Кітапхана – мақтанышым, кітапханашы – мамандығым» атты жас кітапханашылар байқауымен жалғасты. Байқауда 6 кітапханашы бақ сынасып, 5 бөлім бойынша өз өнерлерін ортаға салды.

Байқауға Ә.Тәжібаев атындағы облыстық ғылыми әмбебап кітапханасының бөлім меңгерушісі Қалдыгүл Досмағанбетова, кітапхана қызметкері Айгүл Әбжәмиқызы, Ақжар ауылының әкімі Нұржамал Тұрсынбаева төрелік етті. Байқау қорытындысы бойынша І орынды Ақжар ауылының кітапханашысы Ақмарал Әміралиева, ІІ орынды балалар кітапханасының кітапханашысы Меруерт Бөгенбаева, ІІІ орынды оқырмандарға қызмет көрсету бөлімінің кітапханашысы Ұлжан Өтешова иеленді. Ал балалар кітапханасының кітапханашысы Жаңагүл Ұзақбаева, оқырмандарға қызмет көрсету бөлімінің кітапханашысы Мөлдір Жазықбаева, кент кітапханасының кітапханашысы Лаура Демеуова аудандық мәдениет және тілдерді дамыту бөлімінің алғыс хатымен марапатталды.