Аудан әкімі халықаралық би байқауының жеңімпаздарын қабылдады
Аудан басшысы Жандос Еркінбек Ташкент қаласында өткен «Ташкент Гранд Фестиваль» халықаралық би байқауында жүлделі І орын иеленген «Айқаракөз» би тобын қабылдап, жарқын жеңістерімен құттықтады.– Аудандық мәдениет үйі жанынан құрылған би ұжымы Ташкент қаласында өткен байрақты бәсекеде І орын иеленіп, ел мерейін өсірді. Бұл жеңіс ауданның мәдени өміріне зор мақтаныш алып келді, – деді аудан әкімі.
Сондай-ақ, жеңімпаздарға шығармашылық табыстар мен болашақта биік белестерді бағындыруға тілектестігін білдіріп, ауданның талантты жастарына әрдайым қолдау көрсететінін айтты. Сонымен қатар, би тобының жетекшілерін алғыс хаттармен марапаттап, сый-құрмет көрсетті.
Жиын барысында аудандық мәслихат төрағасы Ә. Қошалақов, Жосалы кенті ардагерлер кеңесінің төрағасы Е. Ұзақбаев, аудандық әйелдер кеңесінің төрайымы К. Раева да құттықтау сөз сөйлеп, жас өнерпаздарға өздерінің ізгі лебіздерін білдірді.
