– Ағамыз елде беделі бар азамат болған. Ол кісінің атындағы білім ошағының жаңа үлгіде салынып, сапалы білімнің ошағына айналғанына қуаныштымын. Бұл – біз үшін зор мәртебе. Алдағы уақытта Ү.Томановтың бюсті қойылады деп жоспарлануда, – деді А.Томанов.

Айта кетей ік, таяуда ғана ашылу салтанатына облыс әкімі Қ.Көшербаев қатысқан білім ошағы жаңа заманға сай үлгіде салынған. 300 орындық екі қабатты нысанды облыста сапалы құрылыс салудан алдыңғылардың бірі «Аманқұрылыс» серіктестігі орындап шықты.

Білім ошағында жаңа үлгідегі спорт залы бар. Оған қоса 21 365 дана кітап қоры бар кітапханасы мен оқу залы да оқырман қауымға қызмет етеді.

– Жалпы кітап қорының 10 133-і оқулық болса, 8 903-і көркем әдебиет. Көне мектепте оқу залынан қиналатын едік. Мұнда бәрі бар. Технология, информатика кабинеттері де баланың қиялын жүйрік, ойын ұшқыр етер түрлі жабдықтармен толықтырылған. Электронды оқулықтарымыз да сөреде тұр. Түптеп келгенде балаларға барлық мүмкіндік ұсынылып отыр, – деді мектеп директоры Алтынша Кенжеева.