Жыл сайын көктем-күз айларында Конго-Қырым геморрагиялық қызбасы ауруының алдын алу мақсатында елді-мекендерде кенелерге қарсы арнайы мекемелермен залалсыздандыру жұмыстары жүргізіліп келеді.

Осы орайда, Қармақшы ауданы әкімінің орынбасары Әнуар Айдын Серікұлының төрағалығымен Конго-қырым геморрагиялық қызбасына қарсы көшпелі жиын өткізілді. Жиынға облыстық жұмылдыру дайындығы басқармасынан Б.Садықов қатысып, саптық қарау өткізілді.

Жалпы аудан аумағында Конго-Қырым геморрагиялық қызбасы ауруының табиғи ошағында қоныстанған аудан тұрғындарын қорғау жөніндегі шараларды жүргізу мақсатында арнайы мекеме кент, ауылдық округтерде кестеге сәйкес кенеге қарсы залалсыздандыру жұмыстарын бастады.

Осы ретте залалсыздандыру жұмыстары жүргізілмес бұрын әрбір тұрғын мал ұстайтын қораларына санитарлық тазарту жұмыстарын жүргізу үшін алдын ала дайындап қою керектігін ескертеміз.

Сонымен қатар механикалық тазарту жұмыстарының қорытындысында арнайы топ елді мекендерді аралап мониторинг жүргізетін болады.