Ер есімі ұлықталған байқау
Қармақшы ауданы бойынша білім бөлімінің әдістемелік кабинетінің жоспарына сәйкес Елеу Көшербаев атындағы №279 мектеп-лицейінде Елеу Көшербаев атындағы дәстүрлі ІІ аудандық ауыл мектептерінің 9-10 сынып оқушылары арасындағы “Ел есінде Елеу аға, Ел-аға” тақырыбында ғылыми - зерттеу жұмысы конкурсы болып өтті.
Конкурстың мақсаты - ауыл мектептірінің 9-10 сынып оқушылары арасындағы зерттеу қызметінің дағдыларын дамыту. Жоғары жастағы мектеп оқушыларының интеллектуалдық-шығармашылық әлеуетін қалыптастыруға ықпал ету.
Конкурсқа қатысушыларды мектептің домбырашылар ансамблі күмбірлеген күйімен, өнерпаздар өлең -жырларымен қарсы алды. Келген қонақтарды мектеп ғимаратындағы мемлекет және қоғам қайраткері Елеу Көшербаев атындағы музеймен таныстырылым жұмыстары жүргізілді.
Іс-шараға Қармақшы аудандық білім бөлімінің әдістемелік кабинет меңгерушісі Ш.Наукебаева, Ақай ауылдық ақсақалдар алқасының төрағасы Ж.Қыпшақбаев, ардагер ұстаздар Д.Маханбетов, Р.Жандыбаевалар және Елеу Көшербаев атамыздың ұрпағы қатысты.
Ауыл мектептерінің 9-10 сынып оқушылары арасындағы зерттеу жұмысында "Ауылым -алтын бесігім" бағытында туған ауылының тарихын зерттеу, "Ел есінде Елеу аға, Ел - аға” бағытында мемлекет және қоғам қайраткері Е.Көшербаевтың өмір жолынан ізденіс, "Ұлы ерлік - ұрпаққа үлгі!" бағытында ауылындағы соғыс ардагерлерін зерттеу жұмыстары қамтылды.
Ғылыми -зерттеу конкурсының қорытындысы бойынша қатысушылар Қармақшы аудандық білім бөлімінің басшысы Г.Абдазиеваның дипломдарымен марапаттталып, Елеу атаның ұрпақтары конкурсқа қатысқан оқушыларды сыйлықтармен марапаттап, демеушілік жасады.
