Жағдай әлі де күрделі
Еліміздің батыс өңірінде су деңгейі шамалы төмендегенімен, елдің орталық, солтүстік және шығыс бөлігінде өзен сулары көтеріліп жатқаны байқалады. Әзірге бес облыста су басу қаупі бар. Жергілікті ауқымдағы 20 төтенше жағдай жарияланды. Ал Ақтөбе, Қостанай, Батыс Қазақстан облыстарында жағдай әлі де күрделі.
ТЖМ (Төтенше жағдайлар министрлігі) қорғаныс саласымен бірлесіп, аэровизуалды дрондар арқылы өзендер мен су қоймаларындағы жағдайға тұрақты бақылау жүргізіп жатыр. Ал кейбір өңірлердегі өзендерде мұз жару басталды.
«Мұз кептелістерінің алдын алу мақсатында Ақмола облысы Целиноград ауданының Преображенка аулы маңындағы Нұра өзенінде, Шортанды ауданындағы Колутон өзенінде, Абай облысы Бородулиха ауданының Красный Яр аулы маңындағы Уба өзенінде, Қарағанды облысы Осакаров ауданының Николаев аулының маңындағы Сабырқожа өзенінде мұз жару жұмыстары жүргізіліп жатыр», делінген ТЖМ баспасөз қызметінің хабарламасында.
Мәліметке сәйкес Абай, Ақмола, Ақтөбе, Атырау, Қарағанды, Қостанай, Павлодар, Ұлытау, Батыс Қазақстан облыстарының елді мекендеріндегі тасқынға тосқын қою, авариялық-құтқару жұмыстары, еріген қар суын бұру, құм салынған қаптар төсеу, суағарлардың жағаларын нығайту және жұртшылықты құлақтандыру мен адамдарды қауіпсіз жерлерге эвакуациялау жалғасып жатыр.
«Ақтөбе, Қостанай, Атырау, Ақмола, Қарағанды облыстарында 55 жеке тұрғын үй және 8 аула аумағы су астында қалған (су тасқыны басталғаннан бері 1 376 үй және 1 319 аула аумағы). 28 үй мен 39 аула аумағынан еріген қар суы сорғызылды (су тасқыны басталғаннан бері 358 үй мен 988 аула аумағынан су сорғызылды). 1 345 адам, оның ішінде 496 бала құтқарылды (су тасқыны басталғаннан бері 17 131 адам, оның ішінде 6 683 бала). Қазірге дейін 5,7 млн текше метрден аса еріген қар суы сорғызылған. 638 мыңнан аса қап және 912 мың тонна инертті материал төселді», дейді ТЖМ ресми өкілі Динара Ғалымжан.
Кейінгі деректер бойынша тез еріген қар суы Ақмола облысы Жарқайың ауданының Пригородное аулындағы 8 жеке тұрғын үйді басып қалған. 19 адам, оның ішінде 2 бала және 1 жүкті әйел құтқарылып, тұрғындар туыстарының үйлерін уақытша паналай тұруға мәжбүр. Сондай-ақ ауыл тұрғындарының 34 бас малы қауіпсіз жерлерге жеткізілді.
«Республикалық, облыстық және жергілікті маңызы бар 18 автожолды су шайды. Су шайған 77 автожол, оның ішінде 4 көпір және 73 жол төсемі, су жүрген 93 автожол бақылауда. Жергілікті атқарушы органдар халықпен байланыс орнатып, қажетті азық-түлік және дәрі-дәрмек қорларын құрған, 67 елді мекен көлік қатынасынсыз қалды», дейді Д.Ғалымжан.
Ақтөбе облысында «Тереңсай» бөгетінің суы арнасынан асып, Әйтеке би ауданының Әйке аулындағы 2 жеке тұрғын үйді су басқан. Әйке аулынан Жүргенев аулына 297 адам, оның ішінде 79 бала эвакуацияланды. Ал Ойыл ауданының 5 елді мекеніндегі жеке үйлерді су басуына байланысты Қорғаныс министрлігі әуе кемелері арқылы 85 адам, оның ішінде 27 бала құтқарылған. Бұл аудандарда еріген қар суын бұру мен сорғызу және халыққа көмек көрсету жұмыстары қарқынды жүріп жатыр.
ТЖМ мәліметіне сәйкес Батыс Қазақстан облысы Теректі ауданы Ұзынкөл кентін су басу қаупі төніп тұр. Егістіктерден келген мол мөлшердегі қарғын су Ұзынкөл су қоймасын арнасынан асырып барады. Осыған орай Теректі ауданы Подстепное аулының 705 тұрғыны алдын ала эвакуацияланды. Әзірге су қоймасының бөгеттерін күшейту жұмысы қолға алынды.
Авариялық-құтқару жұмыстарына ТЖМ, ҚМ, ІІМ, ҰҚК, жергілікті атқарушы органдардың, ұйымдардың 12 мыңнан аса адам, 2,5 мың техника, 801 су айдау құралы және 105 жүзу құралы, 9 әуе кемесі жұмылдырылған.
egemen.kz
