Мейрам жақындағаннан-ақ уатсап желісіне жігіттерге әзіл болсын әрі қыздардың ойын білейін деген ниетте «Ал, жігіттер, шығындалуға дайындалайық» деп жазба қалдырдық. Сәлден соң «Маған не сыйлайсың?», «Жеңгеңе сыйлық әкелуді ұмытпа» деген түрлі сарындағы жақындарымның шымшыма әзілдері келе бастады. Осындайда «Әттең-ай, әттең. Бір өзім жалғыз. Бәріңе бірдей, алып берер ем» деп айтқың-ақ келетінін қайтесіз. Қалтаңның салмағы мен жұқа-қалыңдығына да қарап қоясың. Сол бір ұшы көрінетін қаржы ғой.

Жалпы жылына бір келетін 8 наурызда ер азаматтардың айтарлықтай шығындалатыны анық. Өйткені бұл күні қыздардың көңілінен шығатын тауарлардың бағасы да шарықтап шыға келеді. Бәрі анасын, жұбайын, әпкеқарындасын, тіпті жақындарын қуантуға асығады. Одан бөлек мерекеде қыз-келіншектердің құшағын гүлсіз елестету мүмкін емес. Мұндайда гүлдердің көшін раушан бастап, сөрелерде роза, мамыргүл, хризантема, қызғалдақ, тағы басқа гүлдер көздің жауын алардай менмұндалайды. Алайда сырттан әкелінетін хош иісті гүлдер түріне қарай қымбаттай түседі. Дегенмен жігіттер қауымы жақсы көретін жандары үшін құшақ-құшақ гүлді бағасына қарамай сатып алады.

Жақында әлеуметтік желіде бір жігіттің мереке қарсаңында 6 млн теңгеге шығындалғаны көзге ілікті. Ол дәл мереке күні қызына тосын сый жасап, сөз салған. Әлгі жігіт бұған дейінгі мерекелерде, туған күнінде де осынша қаржы кеткенін жасырмады. Ең бастысы, шынайы сезім дейді.

Иә, нәзікжандылардың жылы да шуақты мерекесінде қанша шығындалсақ та жарасады. Әйелдер қауымы қашанда мұндай сый-құрметке, ыстық ықыласқа лайықты. Себебі әйел – ана, әйел – бақыт, әйел – гүл. Ендеше мереке қарсаңында көңілдеріңіз сәнді, өмірлеріңіз мәнді болсын деп тілек білдіреміз.