Аймақ басшысының аудандағы жұмыс сапары: Қармақшылықтар жаңа жылды жаңа баспанада қарсы алады
Аймақ басшысы Нәлібаев Нұрлыбек Машбекұлы ауданға жұмыс сапарымен келді. Сапар барысында өңір басшысы 51 отбасына баспана кілтін табыстап, барша қармақшылықтарды келе жатқан Жаңа 2024 жылмен құттықтады.
Мемлекет басшысының қолдауымен жүзеге асырылып жатқан "Қуатты өңірлер – ел дамуының драйвері" ұлттық жобасы аясында табыс етілген үйлер әлеуметтік статусқа ие, тұрғын үй кезегінде тұрған отбасыларына берілді.
"Халықты баспанамен қамтуды мемлекеттің әлеуметтік саясатының басым бағыттарының бірі деп танысақ, өңірімізде пайдалануға берілген тұрғын үйлердің көлемі жыл сайын артуда. Қазіргі таңда аймақ бойынша 4170 пәтерлік 300 тұрғын үйдің құрылысы жүргізілсе, биыл 2500-ге жуық пәтер жаңа қоңыс иелеріне табысталып, нәтижесінде 11 мыңнан астам жерлесіміз баспаналы болды. Бүгін Қармақшыда 51 отбасы жаңа үйге қоныстанды. Бұл – тұрғындардың әл-ауқатын арттыруға бағытталған мемлекеттік қолдаудың нақты көрінісі", – деді Нұрлыбек Машбекұлы құттықтау сөзінде.
Әлеуметтік шара барысында Нұрлыбек Машбекұлы аталмыш үйлердің құрылысын жүргізген мердігер мекеме өкілдеріне және ауданның бірқатар азаматтарына марапат тапсырды.
Жаңа жыл қарсаңындағы қармақшылықтардың бұл қуанышы мемлекет тарапынан көрсетілген қолдаудың бір парасы ғана. Еске сала кетейік, аталған ұлттық жоба аясында келесі жылы 100 тұрғын үй салынады деп күтілуде. Бұл дегеніңіз, ұлттық жобаның игілігін көретін тұрғындар саны жыл өткен сайын артатын білдіреді.
Қармақшы ауданы әкімінің баспасөз қызметі
