Бұл материалдық игіліктермен қатар, дәрігерлердің де біліктілік шеберліктері сынға түсуде. Атап айтқанда, жақында ұлт саулығын ұлықтаған және дәрігерлердің кәсіби шеберліктерін анықтаған «Медицина үздігі – 2023» республикалық конкурсы өткізілген болатын. Осы байқауға аудандық емхананың жалпы тәжірибелік дәрігерлер бөлімінің меңгерушісі Динара Жүсіпова қатысып, «Үздік медициналық алғашқы көмек дәрігері» номинациясының жеңімпазы атанды.

Дәрігер кешегі елді қыспаққа алған пандемия кезінде де қызметіне білек сыбана кірісіп, адалдығын таныта білді. Ақ халатты абзал жан бала күнінен адам жанының арашашысы болуды қалаған. Жалпы медицина саласына екінің бірінің жүрегі дауалай бермейтінін ескерсек, бұл да бір батылдықтың түрі деп қабылдауға әбден болар. Басқа жоғары оқу орындары студенттерін 4 жыл көлемінде оқытып, маман етіп шығарса, медициналық жоғары оқу орны 7 жылды, одан соң тағы да бірнеше жыл қосымша оқуды қажет етеді. Қиындықтан қыңбайтын қайсар мінезімен Динара дарынды балалар мектебін «Алтын медальға» бітіріп, С.Асфендияров атындағы Қазақ Ұлттық медицина университетіне, оның ішінде «Емдеу ісі» факультетіне оқуға түседі. Мұнда да озаттар қатарында оқып, еңбек жолын бастайды. Емханада 2012 жылдан бері абыройлы қызмет етіп келеді. Оған әркез емделіп, науқасынан айыққан адамдардың алғысы күш-қайрат береді. Ол тек қана науқастардың тәнін емдеп қоймай, рухани жағынан да дем беріп, ауруынан тез айығып кетуіне себепші болып жүрген өз ісінің шебері.

Ұлттық байқауға еліміздің әр өңірінен 1500 медицина саласының қызметкері қатысқан. Оның арасынан 52-сі финалға өтіп, бағын сынаған. Олардың қатарында медицинаның әр саласынан 12 номинация бойынша бір-бір үздік дәрігерден таңдалған. Яғни жеңімпаздардың арасында біздің жерлесіміз Динара Мырзабекқызының ойып орын алып, марапат биігінен көрінуі – ауданымыздың ғана емес, Сыр бойы халқы үшін де үлкен абырой.