Қазгидрометтің мамандары күздің соңғы айы мен келе жатқан қыс мезгілінің ауа райы болжамын ұсынды, деп хабарлайды Egemen.kz.

Қарашада жылы және аязды күндер жиі ауысады, ай бойы жауын-шашын түсіп, екпінді жел соғады. Солтүстік облыстарда кей күндері бұрқасын болуы мүмкін, ел аумағында көктайғақ пен тұман болады.

«Республиканың солтүстік жартысында, шығысында және орталығында айдың екінші жартысында қысқы аязды ауа райы болады.

Суық ауа массаларының енуімен ең суық күндердегі термометрлер төмендейді:

республиканың солтүстігінде түнде -20-27°С, күндіз -8-13°С дейін;

оңтүстік жартысы мен оңтүстік-батысында түнде -3-12°С, күндіз -1+5°С дейін», деп жазды ведомстводан.

Иран мен Жерорта теңізі аймақтарынан жылы ауа массалары келгенде ауа райы жылынады:

республиканың оңтүстік жартысында күндіз +8+17°С дейін;

солтүстік жартысында +3+10°С дейін.

Қазақстанның басым бөлігінде ауа температурасы нормадан 1° шамасында немесе одан жоғары, қиыр солтүстігінде -1° төмен болады.

Республиканың басым бөлігінде жауын-шашын мөлшері нормаға жақын, республиканың орталық және шығыс облыстарында, сондай-ақ оңтүстігі мен оңтүстік-шығысындағы таулы және тау бөктеріндегі аймақта нормадан жоғары болады. Қыста жауын-шашын мөлшері нормаға жуық немесе одан жоғары жылы болады. Суық кезеңде республика аумағына Атлантикалық аймақтардан жылы және ылғалды ауа массалары кіреді.

Алдағы қыста Қазақстанның барлық аумағында ауа температурасы климаттық нормадан басым 1-2° жоғары болады. Тек желтоқсанда Қазақстанның басым бөлігінде ауа температурасы климаттық норма шегінде, ал солтүстігі мен шығысында нормадан 1° төмен болады.

Қаңтар және ақпанда еліміздің басым бөлігінде жауын-шашын нормаға жақын немесе одан жоғары болады, желтоқсанда жауын-шашын нормаға жақын, республиканың солтүстік жартысында нормадан төмен болады.

Наурызда Қазақстанда ауаның орташа айлық температурасы нормадан 2°С жоғары болады деп болжанып отыр. Еліміздің басым бөлігінде жауын-шашын нормадан жоғары болады.