Астана көшелерімен «торға» қамалған келінді алып өтті

АСТАНА. ҚазАқпарат – «Жаңа адамдар» жастар қозғалысы Қылмыстық кодекске қыз алып қашуға қатысты бөлек бап бекітілуін қолдайды. Осы мақсатта белсенді жастар елордада акция өткізді, деп хабарлайды ҚазАқпарат.

Қазір қылмыстық заңнаманы жетілдіру ісі қарастырылып жатыр. Осыған сәйкес Қылмыстық кодекстің 125-бабына жәбірленуші өз еркімен босатылған жағдайда қылмыстық жауапкершіліктен босатуды көздейтін жеке бап енгізу және ескертуді алып тастау қарастырылады.

«125-1-бап «Неке қию мақсатында адамды алып қашу» әйелдерге қатысты зорлық-зомбылық деңгейін төмендетуге тиіс. «Жаңа адамдар» қылмыстық кодекске мұндай түзетулерді тезірек қабылдауға шақырады. Әйелдер мен олардың қоғамдағы рөлі туралы ескірген идеяларды қамтитын қыз алып қашу мәселесіне назар аудару қажет. Осы «тұрмыстық» зорлық-зомбылықтың құрбаны болған қыздар сұмдықпен күресудің соңғы жолы ретінде суицидті таңдаған жағдайлар бар.

Түзетулерді қабылдау мерзімін кешіктіруге болмайды. Бұл бастамаға назар аудару үшін «Жаңа адамдар» белсендісі, Ғазиза Ұлықманова қалыңдық көйлегін киіп, той үлгісінде безендірілген тормен Астананы аралап шықты. «Алып қашу» торы Министрліктер үйінің алдына тоқтап, қозғалыс белсендісі депутаттарға түзетулердің енгізілуін талап еткен плакаттармен үндеу тастады», - делінген хабарламада.

«Қыз алып қашу, күштеп күйеуге беру – дәстүр емес, қылмыс. Ұрлаушылар жауапкершіліктен жалтарып, лас жұмыстарын аяқтауға бірде-бір мүмкіндігі болмауы керек. Әрбір адамның өмірі қымбат және біз осы зұлымдықты тоқтату үшін дереу әрекет етілуін талап етеміз. Біз әйелдерді қорлап қана қоймай, кейде зорлық-зомбылыққа, тіпті өлімге әкелетін «әдет-ғұрыпқа» қарсымыз», - деді «Жаңа адамдар» жастар қозғалысының белсендісі Ғазиза Ұлықманова.

Бұған дейін елімізде қыз алып қашу әрекетіне жауапкершілік күшейтілетінін жазған едік. Қазір уәкіл кеңсесі тұрмыстағы әрі отбасындағы зорлық-зомбылық пен әйелдердің құқықтарын бұзу мәселелеріне талдау жүргізіп жатыр.