Қызылорда облысында туу көрсеткіші артуда
Қызылорда облысы елдегі туу көрсеткіші бойынша бесінші орында тұр. Сондай-ақ күніне орташа есеппен 55-ке дейін сәби дүниеге келіп, айына 1600 сәби дүние есігін ашқан. Бұл туралы Өңірлік коммуникациялар қызметінің ақпараттық алаңында өткен баспасөз конференциясында облыстық статистика департаменті басшысының міндетін атқарушы Гүлмира Нұрқабылова мәлімдеді.
-Осы жылдың 1 сәуірінде облыстағы халық саны 836,5 мың адамды құрады. Тиісті кезеңмен салыстырғанда халық саны 1,3 пайызға өсті. Ал облыс халқының табиғи өсімі 3,6 пайызға артты. Сондай-ақ көші-қон қызметі органдары ұсынған мәліметтерді өңдеу нәтижесінде, 2023 жылғы қаңтар-наурызында облысымызға тұрғылықты тұруға келгендердің тіркелу саны 4490 адамды құрады. Одан бөлек, аймақтан кеткендердің саны 5414 адам. Көші-қонның айырымы - 924 адамды құрап отыр. Мұнан өзге, алыс және жақын шет елдерден 4 адам, республиканың басқа облыстарынан 1331 адам келді,-деді Гүлмира Жеткергенқызы.
@ Өңірлік коммуникациялар қызметі
