Жас отбасылар байқауы
qarmaqshy-tany.kz Халықаралық отбасы күніне байланысты Байқоңыр қаласындағы «Жастар ресурстық орталығы» мен облыстық «Самғау» қоғамдық бірлестігінің бірлесе ұйымдастыруымен «Отан – отбасынан басталады» атты жас отбасылар байқауы өтті. Байқаудың мақсаты – өскелең ұрпақтың адамгершілікрухани дамуында отбасылық құндылықтардың рөлін нығайту, ұрпақтар сабақтастығын, отбасылық қарым-қатынастар мәдениеті мен салттарын сақтау.
Байқауда оған қатысушы жас отбасылар әділқазылар қойған шарттар бойынша «Менің отбасым» өзін-өзі таныстыру, «Өнерлі жанұя» отбасылық өнер, «Жанұя бірлігінің құпиясы» атты түрлі ситуациялық сұрақтарға жауап беру кезеңдері бойынша өзара сынға түсті.
Байқау барысында оған қатысушылардың бірі – өлең арқылы өзі мен жанұясын таныстырса, енді бірі – қолөнер шеберлігімен, ас дайындау, сонымен бірге басқа да үлгілі істерімен өнерлерін паш етті.
Қызықты да көңілді сәттерге толы байқау нәтижесінде І орынды Каликеевтер отбасы жеңіп алса, ІІ орынды Таласбаевтар отбасы, ал жүлделі ІІІ орынды Қанибековтер отбасы иемденді.
Байқау соңында жүлдегерлер мен оған қатысушылар арнайы дипломдармен марапатталып, сыйқұрметке бөленді.
Нұрбай ЖАНӘДІЛОВ
