Көзінің тірісінде Жәрімбет би Төретам кентінің аумағына ұрпағын қоныстандырып, келешекте бұл жерде дүние жүзіне танымал, үлкен қала болатынын айтып кеткен. Бүгінде қанатын кеңге жайған баба ұрпақтары еліміздің дамуына адал қызмет атқарып келеді.

Отан қорғаушылар күнінде Төретам кентінде Жәрімбет би атына көше атауы берілді. Салтанатты шараға облыс әкімінің орынбасары, ҚР Президентінің Байқоңыр кешеніндегі арнаулы өкілі Қайрат Нұртай, аудан әкімі Жандос Еркінбек және Байқоңыр қаласы әкімшілігі басшысының орынбасары Тимур Вербицкий қатысып, құттықтау сөз сөйледі.

Баба атына берілген көше Төретам кентінің кіреберіс көшесінен Жанқожа батыр көшесінің қиылысына дейінгі аралықты қамтиды. Сонымен қатар, ол кенттегі инфрақұрылымы жақсы дамыған орталық көшелердің бірі.

Шара барысында аудандық ардагерлер кеңесінің төрағасы Асқар Мереков, әулие ұрпақтары атынан облыстық мәслихат депутаты Әмірбек Шаймағанбетов жылы лебіздерін білдіріп, «Жәрімбет би» атындағы көшеге қойылған стелланың лентасын қиды.