qarmaqshy-tany.kz Бүгін аудандағы іргелі шаруашылықтардың бірі «Жаңажол» серіктестігінің егін алқабында алғашқы дән себу рәсімі өтіп, егін егу науқаны басталды.

Аталған шараға қатысқан аудан әкімі Жандос Еркінбек дала диқандарының қажырлы еңбектеріне сәттілік тілеп, қасиетті Қармақшы жерінен шыққан еңбек майталмандарының өнегелі өмір, еңбек жолын жас ұрпаққа үлгі ету, жастарды адал еңбекке баулу бағытындағы жұмыстарды жан-жақты жүргізу қажеттігін атап өтті.

Биыл аудан бойынша 26 709 гектар жерге ауыл шаруашылығы дақылдарын орналастыру жоспарлануда. Оның ішінде, негізгі дақыл – күріштің көлемі 13 500 гектар.

Сонымен қатар, аймақ басшысының тапсырмасына сәйкес сырттан келетін өнім көлемін азайтып, тұрғындардың негізгі бақша өнімдерімен өзін-өзі қамтамасыз етуі үшін аудан әкімдігі мен ірі шаруашылықтар тарапынан егіс егемін дейтін аудан тұрғындарына бақшалық жерін жыртып, дайындап беруге қолдаулар көрсетілуде. Атап айтқанда, аудан бойынша қосымша 392 гектар бақшалық жер дайындау жоспарланып, оған 736 отбасы бақша егуге ниет білдіріп отыр.

Алғашқы дән себу рәсімінде ауылшаруашылық саласының ардагері Орынбасар Сариев дала еңбеккерлеріне батасын берді.
Мұнан соң қатысушылар «Жаңажол» ауылындағы көлемі 5 гектар болатын алмабақ пен 37 гектар бақшаны көріп, биыл бірінші рет егіліп жатқан 1 гектарлық жабынды астындағы қарбыз егу жұмыстарымен танысты.

Іс-шараға аудан әкімімен бірге аудан ардагерлері, ауылшаруашылық саласының майталмандары қатысты.