Балалар ғарышкерлер мұражайында
qarmaqshy-tany.kz ЕГЕМЕН ЕЛІМІЗДЕ БІЛІМ БЕРУДІҢ ЖАҢА ЖҮЙЕСІ ЖАСАЛЫП, ӘЛЕМДІК БІЛІМ БЕРУ КЕҢІСТІГІНЕ ЕНУГЕ БАҒЫТ АЛУДА. ОСЫҒАН ОРАЙ, СОҢҒЫ КЕЗДЕ ОҚЫТУДЫҢ ӘРТҮРЛІ ПЕДАГОГИКАЛЫҚ ТЕХНОЛОГИЯЛАРЫ ЕНГІЗІЛІП, МЕКТЕП ПРАКТИКАСЫНДА ҚОЛДАНЫЛУДА.
Әрбір мұғалімнің алдында оқушылардың үлгерімін көтеру мақсаты қойылды. Бірақ мұғалімнің сабақта таңдаған жұмыстың орташа ырғағы оқушылардың біріне ыңғайлы, екіншісі үшін жылдам, қалғандарына тіпті баяу болуы мүмкін. Сондықтан мұғалім сабақта жаңа технологияларды қолданып, оқыту сапасын арттыруы қажет. Бұл бағытта бастауыш сынып мұғаліміне де қойылар талап жоғары. Сыныбымыздың оқушыларымен олардың қызығушылығын, танымын арттыру және сабақ процесінде «Жаратылыстану» пәнінен «Жер және ғарыш» бөлімі бойынша алған білімдерін толықтыруда Байқоңыр қаласындағы қалалық мәдениет үйінде орналасқан «Ғарышкерлер мұражайына» саяхат жасадық.
Оқушыларға ең алғашқы ғарышты зерттеу мақсатының бастау алуынан бүгінгі даму дәрежесіне дейін жан-жақты ақпарат берілді. Балалар жұлдызды қалашықтан бастап, зымыранның әр бөлшегі үшін тер төккен тұлғалар жайлы мәлімет алды. Алып зымырандардың қызметі мен шығу тарихы, олардың ғарышқа сапарымен танысты. Ғарышкерлердің ғарыштағы тұрмыстіршілігі мен азық-түлігі балалардың қызығушылығын тудырды. Балалар гид маманның ғарыш денелері, ғаламшарлар туралы сұраған қызықты сұрақтарына таласа жауап берді. Жер шарының әр түкпірінен келген ғарышкерлерге қазақ халқының тұрмыс-тіршілігін, тарихын дәріптейтін ұлттық қазақи нақышта безендіріліп, жабдықталған бөлме оқушыларға да керемет әсер қалдырды.
Айгүл САҚТАПБЕРГЕНҚЫЗЫ,
№85 мектептің мұғалімі
