Ақпанда ауа райы қалай болмақ?
«Туған ай – тураған етпен тең» деп халқымыз бекер айтпаса керек, ә дегенше қыстың соңғы айын да бастадық. Әдетте қаңтар, ақпан айлары ызғарлы суығымен, бет қаратпас қарлы-боранымен есте қалатын. Алайда былтыр және биыл аймақта ауа райы халық күткендей емес. Биылғы қаңтарда күн райы аса бір суық бола қойған жоқ, сонысымен жанға да, малға да жайлы сезілді. Ал ақпаннан не күтеміз?
«Қазгидрометтің» облыстық филиалының болжамынша, ауаның орташа айлық температурасы -4-8,9 градус күтіледі. Бұл облыстың басым бөлігінде норма шамасында, облыстың оңтүстігінде нормадан 1 градус жоғары (норма: -1,4-9,4°С).
Бірінші онкүндіктің екінші жартысында ауа температурасы түнде -10-15 градус, оңтүстік-шығыста -5 градусқа дейін төмендеуі болжануда.
Екінші онкүндікте ауа температурасы түнде -5-10 градус, облыстың оңтүстік-шығысында 0 градустан -10-15 градусқа, түнде -16-21 градус, солтүстік-батысында -24 градусқа дейін төмендеуі мүмкін. Онкүндіктің аяғында ауа температурасының жоғарылауы күтіледі.
Ал үшінші онкүндіктің басында ауа температурасы түнде -7-12 градус шамасында сақталып, кей жерлерде жылынуы тиіс.
Жауын-шашынның айлық мөлшері облыстың басым бөлігінде нормадан көп, облыстың солтүстік-батысында норма шамасында күтіледі (норма: 7-19 мм). Бұрқасын бірінші және екінші онкүндіктердің ортасына болжануда. Жел 15-20 м/с бір ай ішінде жиі соғуы мүмкін.
Наурыз айында болжам бойынша ауаның орташа айлық температурасы облыстың басым бөлігінде нормадан 1° жоғары (норма: -6,7+0,0°С). Жауын-шашынның айлық мөлшері облыстың солтүстігінде, оңтүстігінде нормадан көп күтіледі (норма: 10-22 мм).
«СБ» ақпарат
