qarmaqshy-tany.kz Бүгін Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай өңір кәсіпкерлерімен кездесті.

Байқоңыр қаласы прокуратурасының бастамасымен ұйымдастырылған кездесудің басты мақсаты аймақтағы кәсіпкерлердің құқығын қорғау мәселелерін талқылау. Мемлекет басшысы Қазақстан халқына Жолдауында прокуратураның қадағалауын азаматтар мен бизнестің проблемаларын тиімді шешуге қайта бағыттауды тапсырды. Осыған байланысты азаматтар мен кәсіпкерлердің құқықтарын қорғау саласындағы қадағалауды күшейтуге бағытталған бірқатар шаралар қабылдануда.

Атап айтқанда, Байқоңыр қаласы, Төретам кенті және Ақай ауылдық округы бойынша кәсіпкерлердің құқықтарын қорғау мақсатында Байқоңыр қаласы прокуратурасы жанынан кәсіпкерлердің құқықтарын қорғау жөніндегі мобильдік топ құрылды.

Мобильдік топтың міндеті – мемлекеттік органдар тарапынан кәсіпкерлік субъектілерінің құқықтарын бұзу және бизнеске кедергі келтіру туралы өтініштер мен қоңырауларға жедел әрекет ету болып табылады.

Мобильдік топ жетекшісі, Байқоңыр қаласының прокуроры Т.Е.Бектұрсынов кәсіпкерлерге мобильдік топтың жұмыс жасау тәртібін таныстырып өтті. Сонымен қатар, жиында аталған мобильдік топтың мүшесі, Қармақшы аудандық кәсіпкерлер палатасы филиалының директоры А.Қ.Утегенов кәсіпкерлер арасында мобильдік топтың қажеттілігі жайында және жеке кәсіп иелерінің құқығын қорғауда заң аясында берілетін кеңестің маңыздылығын атап өтті.