2020 жылы «Қуатты өңірлер ел дамуының драйвері» бағдарламасы бойынша Қызылорда облысында ірі жобалардың бірі «Батыс Еуропа – Батыс Қытай» автомобиль жолымен жанасатын жердегі көлік айрығын салу» жобасы басталған болатын. 3 жылға созылған құрылыс осы жылы аяқталады. Бұл туралы Өңірлік коммуникациялар қызметінде өткен баспасөз конференциясында облыстық жолаушылар көлігі және автомобиль жолдары басқармасының басшысы Пакуатдин Шамұратов мәлімдеді.

- Өздеріңізге белгілі, жалпы, «көлік айрығы» автомобиль жүргізушілерінің облыс орталығынан магистральді автомобиль дәлізіне кептеліссіз, әрі қауіпсіз қосылуына мүмкіндік береді, - деді басқарма басшысы.

Сонымен қатар, Әйтеке-би кенті мен Қазалы қаласы аралығындағы ұзындығы 7,1 шақырымды құрайтын жалпы құны 2,7 млрд.теңгені құрайтын автомобиль жолын кеңейту жұмыстары жүргізілуде. Бұл жоба да биыл аяқталады.

Айта кету керек, республикалық бюджеттен жолдар мен көшелерге бөлінген қаржы көлемі 2022 жылмен салыстырғанда 2 есеге артты. Аймақ басшының тапсырмасына сәйкес биыл қосымша 16,5 млрд.теңге көлемінде инвестиция тарту межеленуде.

Жалпы, қолдау табылған қаражаттарға ұзындығы 440 км құрайтын автомобиль жолдары мен көшелерді және 11 көпірді салуға және жөндеуге бағытталды.