Жыл таланттары

qarmaqshy-tany.kz Ү.К.Томанов атындағы №183 орта мектебі «Балалар жылын» қорытындылау, оқушылардың жетістіктерін, бағындырған асулары мен белестерін көпшілікке таныстыру, дарындылығымен топты жарып шыққан оқушыларды марапаттау мақсатында ️«Білімді жастар – ел болашағы» атты «Жыл таланттары» тақырыбында шеру ұйымдастырылды. Шеру барысында мектеп директоры оқушыларға жылы лебізін білдіріп, мектеп мақтаныштарын, білім, өнер, ғылыми жұмыстар байқауларының жеңімпаздарын, спортты жанына серік етіп, мектебіміздің атын республика, облыс, аудан көлемінде шығарып жүрген спортшылар мен қоғамдық жұмыстарға белсене араласқан оқушыларды алғыс хатпен марапаттады.

Талантты да қабілетті ұландарды дер кезінде байқап, олардың қабілеттерін шыңдап, дайындаған барлық пән мұғалімдеріне оқушылар орындарынан тұрып қошемет білдірді.

Мектеп парламентінің жетекшісі Төлегенов Диас оқушыларға сәттілік тілеп, мектеп сахнасында қаншама жұлдыздың жарқырап, биіктен көрінгеніне куә болғанын, болашақта мектеп жұлдыздарының саны көбейіп, мектеп даңқын шарықтата түсетініне сенім білдірді.