Құқықтық тәрбие және жігер

qarmaqshy-tany.kz «Құқықтық тәрбие және жігер» тақырыбында колледж студенттерімен құқықтық түсіндіру шаралары жүргізілді.

Бүгін Қармақшы ауданы прокурорының аға көмекшісі Е.Есетов, Қармақшы ауданының полиция бөлімінің Ювеналды полиция тобының аға инспекторы Г.Исмайлова, аудандық Жастар денсаулығы орталығының психологы Ә.Кетебаева, колледж директоры Б.Сайдулланың қатысуымен Қармақшы ауданының аграрлы-техникалық колледж студенттерімен «Құқықтық тәрбие және жігер» тақырыбы бойынша түсіндірме профилактикалық жұмыстары жүргізілді.

Мақсаты – колледж студенттерімен құқық бұзушылықтың алдын алу және білім алушылардың өмірі мен денсаулығын сақтау.

Сала мамандарымен өткен шарада білім беру ұйымдарында кәмелетке толмағандар арасындағы қылмыстық құқық бұзушылықтар, зорлық-зомбылық, интернет қауіпсіздігі, ерте жүктіліктің алдын алу, бопсалау, әлімжеттік жасаудың салдары жағдайлары туралы ақпараттық-танымдық біліммен қамтамасыз ету шаралары қамтылды.

Шара барысында колледж студенттеріне «Кәмелеттік жасқа толмағандардың беймезгіл уақытта көшеде жүрмеуі» және «Балалардың қауіпсіз мінез-құлық ережелері» туралы арнайы дайындалған бейнероликтер көрсетіліп, құқықтық жадынама қағаздары таратылды.