Қазақ әншілері Байқоңырда

Осыдан тура 65 жыл бұрын «Байқоңыр» ғарыш айлағынан ғарыштық дәуірдің басталуына даңғыл жол ашылды.

1957 жылы 4 қазанда адамзаттың ғарыш саласына деген үлкен жетістігі ретінде тіркелген алғашқы Жердің жасанды серігі ұшырылды.

Айтулы мереке қарсаңында Байқоңырда мерекелік шара ұйымдастырылып, ғарыш айлағының дамуына үлесін қосқан бірқатар азамат «Байқоңыр қаласының құрметті азаматы» атағын иеленді.

Салтанатты шараға Қазақстан Республикасы Президентінің «Байқоңыр» кешеніндегі арнаулы өкілі Қайрат Ырзақұлұлы Нұртай қатысып, қала тұрғындары мен ғарыш саласы қызметкерлерін айтулы мерекемен құттықтады.

Сонымен қатар, мереке қарсаңында Байқоңыр қаласының Мәдениет сарайында «Роза Бағланова атындағы «Қазақконцерт» мекемесінің ұйымдастыруымен «Қазақ деген халықтың еркесімін» атты мерекелік концерт ұйымдастырылды.

Онда байқоңырлықтарға арнап Мақпал Жүнісова, Бағдат Самединова, Айжан Нұрмағамбетова, Раушан Оразбаева, Құрмаш Махан сынды бірқатар өнер қайраткерлерінен құралған «Қазақконцерт» ұжымы өнер көрсетті.