«Мектепке жол» акциясы – шарапаты мол шаралардың бірі. Мемлекет басшысы Қасым-Жомарт Тоқаев «Балалар – мемлекетіміздің жарқын келешегінің кепілі. Сондықтан да алдағы жылды «Балалар жылы» деп жариялау керек деп есептеймін. Әңгіме жалаң ұран мен мерекелік шаралар туралы емес. Бірінші кезекте билік тарапынан балаларды қорғау үшін денсаулық сақтау, білім беру, әлеуметтік қолдау бағытында нақты шаралар қолға алынуы керек. Өскелең ұрпақтың үйлесімді дамуы мен бақытты балалық шағы – біздің жалпыұлттық міндетіміз, – деген еді.
Елімізде жыл сайын жаңа оқу жылы қарсаңында өткізілетін Республикалық «Мектепке жол» акциясы биылғы «Балалар жылында» да жалғасын тапты.
Байқоңыр қалалық көпбейінді ауруханасының бас дәрігері Талгат Байтилеуов республикалық «Мектепке жол» акциясын қолдау мақсатында аурухана қызметкерлерінің 1-сыныпқа баратын балаларына мектепке қажеттi оқу құралдарын табыстады.